Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


De ligking van Geta in Finlandj.

Geta is 'n gemèndje in Ålandj, Finlandj. De gemèndje haw 507 inweuners op 31 mieërt 2016 en 'n landjoppervlakdje van 84,55 km², van 'n totaal (inclusief water) 605,66 km². De bevoukingsdiekdje is 6,00 luuj de km². De plaatse die inne gemèndje ligke zeen: Andersö, Bolstaholm, Dånö, Finnö, Gräggnäs, Höckböle, Isaksö, Labbnäs, Möckelgräs, Olofsnäs (Olsnäs), Pantsarnäs, Rankoskär, Skinnarböle, Snäckö, Vestergeta (de houfplaats) en Östergeta.

d'n Oetkiektoren oppe Getaberg.

't Naordelik deil van Ålandj kwaam es ieëste door posglaciaal ophöffing oete zieë op, wodoor hie ouch de ieëste beweuning óntsting. Det vindj me noe trögk in späör van weuningen en graver oete steintied. E deil aaj eilandj, wie Snäckö en Finnö, zeen intössen al vasgegreudj aan 't vastelandj. Traditionelerwies laeve de luuj vanne landjboew enne bósboew, mer allewiel zeen toerisme ennen deenstesector wichtiger. Geta deentj es e forenzegebied veure luuj die wirken in Mariehamn.

Geta is in 't naorde van weus en ruug trein. Ane kus staeke rótsformaasjes oet, wo wanjelieërs en bergklummers op aafkómme. Wiejer guuef 't e deil zómplandj, maeren en baeke. d'n Hoogste berg vanne gemèndje, de Getaberg, is beboedj mit 'nen oetkiektoren en e bezeukerscentrum.

De naam Geta zów meugelikerwies zeen aafgelèdj van 'n Aadnórs waord det "inne gate haje" mèndje. Det zów den dinkelik zeen ómdet vieëheljer vanoete hoeag rótsen 't vieë inne gate kósten haje.

De gemèndje is einspraokig Zweeds. De gemèndjecode is 065.

Demografie bewirk

In 2016 woor de laeftiedsverdeiling van de bevouking es völg:

  • 0 toet 14: 15,4%
  • 15 toet 64: 62,5%
  • 65 en ajer: 22%

De spraokverdeiling woor in 2016 det 87,4% vanne bevouking 't Zweeds es ieëste spraok haw; 5,6% haw 't Fins es ieëste spraok en 7% haw 'n anger ieëste spraok.

Hie-ónger völg de demografische óntwikkeling vanaaf 1980.

1980 1985 1990 1995 2000 2005 2010 2015
471 443 478 461 478 444 475 500
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Geta_(Ålandj)&oldid=453848"