Vandaag bèn ich veur d'n ieëste kieër op Wikipedia. Ich waas echt verwónjerdj wiej ich al drek miene naam zaag staon... allee... dao stóng Theo van Daal...mer 't mót zeen Theo Van Dael. Eine dae dit hellop leustj huuërtj 'r gei versjil in. 't Zitj hum dus allein mer inne sjriefwieze! In 1934 (wauw...al zoeë lang geleje) bèn ich geboren in Geistinge en kwaam (nao det ich twieë jaor getrouwdj waas mèt ein Kinderse) in aod-Kinder woeëne in oos vees geboewdj hoes. Eigelik sjrief ich al hieël mie laeve plat want ich waas 27 jaor Vorst vanne Rabbedabbers van Kinder. Es dusdanig maakdjen ich 't Karnevalblaetje (neet gemekkelik want Kinders en Geistingers is lang neet hetzelfdje). Ich waerdje lid van Veldeke Limburg, kwaam inne redaksiej van 't Veldeke blaad woe-in regelmaotig ei gedicht van mich te laeze sting. In 2000 woor ich dördje in de Veldeke Dialekt Literatuurpries en in 2002, mieë bepaaldj op 17 oktoeëber, stichdje wae hiej in 't Belsj VBL, waat stuit veur Veldeke Belsj Limburg, woevan ich tot op hede sikkretaris bèn. Elk jaor geuftj VBL einen almanak oet in zoeveul meugelik B-Limburgse dialekten en veer kieëre per jaor make wae oos clubblaad 't VELLEKE. En nów bèn ich bliej det ich dit hiej eindelik ins in 't echt Kinders höb moge sjrieven en hoop det ich det nog veul jaor maag beoefene!