Gebroeker:Steinbach/Persoenelek
Daag lezer. Iech hoop totste hei gekoume bis umtotste ech in miech geïntrèsseerd bis. Dit geit naomelek neet euver de persoen achter 't gebrukersprofiel, meh euver de mins dao weer achter. Iech bedoel: dit geit neet euver mienen taol-achtergroond, mien studie, mien hobby's of wie iech bij Wikipedia bin gekoume. Dit geit euver get gans persoeneleks. De aofgeloupe daartien, veertien jaor höb iech dat neet mèt uuch gedeild, umtot 't uuch wezelek neet aongeit. Meh 'n recinte gebäörtenis die miech zwoer heet geraak, raak ouch direk aon de rei boeveur iech, es Hollender, oets Limbörgs höb gelierd. Daorum moot iech 't kwiet, en wel hei.
Lui die al hiel laank mètloupe (of in aw pagina's vreutele) kinne wete tot iech jaore geleie same waor mèt Cicero. Dat waore sjoen jaore die jaomer genóg veurbij zien. In deen tied höb iech hiel väöl Limbörgs gepraot (gemaild, ge-sms, ge-msn'd...); zoe bin iech 'ne vleujende spreker gewore. Noe nog goej iech wel ins e Valkebergs wäördsje door mie Mestreechs - e bedink aon häör.
Zij waor evels neet de rei boeveur iech oets mèt 't Mestreechs bin begós. Dat waor 'n aander meidske. Häöre naom kreg geer um privacy-reies neet, meh ze zaot op 't gymnasium bij miech in de klas. Veer woende toen in Zieland en 't Mestreechs späölde nörges in mie leve 'n rol. Wie v'r gónge studere, hele v'r evels good contak. T'rzelfdertied verhuisde zij nao Mestreech, boe ze ouch oets vaandan waor gekoume. Nao e paar jaor gebäörde wat noets hej mage veurvalle: iech woort verleef op häör. En zij natuurlek neet op miech. Meh ze vatden 't good op en v'r hele contak. In dezen tied bin iech Mestreechs goon liere, aon de hand vaan 't beukske Maastrichts vaan Salemans en Aarts en de verhaolebundel Hojheh vaan Pol Brounts. Iech waor ummer al 'nen taole-nerd, en dit waor de meneer um korter bij häör te koume: häör moojertaol.
Mien leefde veur 't Limbörgs bleef, los vaan mie geveul veur häör. Iech voont in december 2004 de Limbörgse Wikipedia, die toen nog gaaroet niks beteikende, en besloot mien nui taolveerdeghede drop los te laote. Cicero, daan al hendeg actief op d'n Hollandse Wikipedia, oontdèkde 't projek korten tied later en zoe kaome v'r online aon de praot. Iers allein euver Wikipedia, daan euver ummer mie dinger. Geer wet intösse boe dat op oetleep. Dat aander meidske woort 'n gewoen vrundin, die iech noe en daan zaog es d'n aofstand tösse Utrech en Mestreech dat touwleet. D'n tied vergóng en v'r woorte allebei volwasse (zij get mie es iech...).
Begin deze maond kraog iech evels e vreiselek beriech. Mien aw vrundin waor hendeg oongelökkeg gevalle en laog mèt 'n hersekneuzing in 't hospitaol, in 'ne coma, aon de beaoseming. Op 't memint vaan sjrieve geit 't al beter, meh godwèt of dat geit doorzètte. Allezeleve kriege v'r ze neet mie trök wie ze waor, en of v'r oets nog same kinne lache euver d'n awwe natuurkundelierer of trökdinke aon 't oetgoon in Middelburg is zier de vraog. Nog noets höb iech iemes vaan miene leeftied mote verlere, neet gans en neet haaf. Dit is 't ergste wat iech vaan mie leve höb gehuurd.
Geer höb woersjijnelek gei versjèl gemerk in mien edits veur en nao dit nuits. Dat klop ouch wel: 't blijf gewoen banaol artikel sjrieve, aofmake, bijwèrke, corrigere en zoe mie. Meh veur miech is de beteikenis zwoer veraanderd. Iech bin innins weer vol vaan 't bezej tot dit allemaol door häör kump, tot iech zoonder dees vrouw gei Limbörgs woord zouw type. Veur 't iers sinds begin 2005 veult 't weer of eder tósj die iech bereur veur häör weurt ingeduid. En umtot iech niks aanders veur 'r kin doen, wèl iech dit aon de wereld kwiet.
Steinbach (euverlègk) 19 aug 2018 01:10 (CEST)
Moch geer uuch aofvraoge wie dit geïndeg is: ze is nao 'nen tied goddaank weer bijgekoume. Mie gaon iech uuch neet vertèlle. Mestreech is klein. Steinbach 🦇 (euverlègk) 6 dec 2021 00:00 (CET)