Gebroeker:Steinbach/Casus

Gooj artikele zien neet te kort, good gefraseerd, compleet en vrij vaan irrelevante ballas. Op 'ne kleine Wikipedia wie d'n euze is 't evels ouch vaan belaank tot 'n artikel neet te väöl roej links heet, zeker neet op punte die vitaol mèt 't oonderwerp in verbinding stoon. Um te kieke wie dat hei wèrk, zal iech eve de roej en blauw links vaan 'n artikel op e rijke zètte.

de casus

Um 't miech gemekelek te make - d.w.z. tot iech good weit boe-euver 't allemaol geit - num iech 'n artikel vaan mien hand: Oos-Vlaams. Op 't memint tot iech dit stökske sjrijf - zaoterdag 9 januari 2010 's middags - zaote dao (in volgorde vaan vindplaots in 't artikel) de volgende blauw en roej links in:

Artikel: Oos-Vlaams

blauw

Nederfrankisch, Belsj, Oos-Vlaandere, Wes-Vlaams, Braobants, middeliewe, Dendermonde, Aalst, Gent, Wes-Vlaandere, Wallonië, Henegouwe, Nederland, Zieland, Terneuzen, Hulst (gemeinte), Ziews, Hollands, Leuve, Brussel, Antwerpe, Limbörgs, Nedersaksisch, popmuziek.

roed

Ninove, Geraardsbergen, Waasland, Sint-Niklaas, Waaslands, Gents, Ronses, Ronse, Tielt, Kortrijk, Elzele, Lessen, Wachtebeke, Overslag, Zuiddorpe, Westdorpe, Koewacht, Sint-Jansteen, Clinge, Nieuw-Namen, Hulst (sjtedsje), Hulsters, substraot, isochronie, elisie, Oudenaarde, h-deletie, Ivan Heylen, hiphop, Andy Sierens.

Good getèld zien dat 24 blauw links en 30 roej.

al wel

Allewel tot 't artikel dus roejer is es tot 't blauw is, liek miech 4/9 blauw veur 'n Wikipedia vaan 5600 artikele gein slechte score. Natuurlek is dees keus neet aselek: de mieste links in 't artikel zien nao geografische en taolkundege artikele. Iech höb intösse alle hoofdialekte oet Nederland en Vlaandere besjreve (nou jeh, iech bin noe bezeg aon 't lèste), get wat op 'n Limbörgse Wikipedia mesjiens neet de alderhoegste prioriteit heet, meh wat miech betröf wel de ein-nao-hoegste: veer mèt 't Limbörgs zitte mèt de aander dialekte in 'tzelfde beutsje (sorry, Hollandse oetdrökking) en die breurkes zien dus ouch veur us intersant. 'n Artikel euver 't Oos-Vlaams besteit ouch op de Wes-Vlaamse en zelfs op de Nedersaksische Wikipedia (dewijl die dialekgróp dao taolkundeg toch neet väöl mèt te make heet!). Wijers höb iech oets de meujte genome um alle Nederlandse gemeintes 'n artikel te geve. Dat maag me euverdreve vinde, want wee interseert ziech noe veur oonbekinde dörpkes in "'t noorde"? Aon d'n andere kant blieke die links wel hendeg es ze blauw kleure in biografieë, en zuut e compleet euverziech vaan gemeintes wel sjiek en verzörg oet.

nog neet

Daan de roej links. Väöl vaan die links zien dörpkes in Ziews Vlaandere. Die zalle nog wel eve roed blieve. Zeker sommege vaan die plaotse zien oontzèttend klein en nogal sej, dus um noe te zègke tot die de prioriteit höbbe... mesjiens maak iech, es iech zin höb, nog wel ins 'n artikel euver de plaots Hulst, meh rekent neet te gaw drop. Datzelfde gelt evels neet veur de Belzje gemeintes die nog roed zien. De maags vaan stei wie Kortrijk en Sint-Niklaas toch wel verwachte tot ze besjreve stoon, en trouwes: 't zouw ouch neet mier es logisch zien um nao de Nederlandse ouch alle Belzje of minstes alle Vlaamse gemeintes blauw te make. Dat zouw zoe al nege (gans Belsj) of zeve (Vlaandere) roej links sjele.
 De res vaan de artikele is veur e groet deil taolkundeg. Wat betröf de Oos-Vlaamse oonderdialekte: die zalle ouch nog wel eve roed blieve. Soms, es iech zin höb, maak iech wel ins 'n artikel aon euver e lokaol dialek boete Limbörg (geer kint uuch was nog wel mien artikel euver 't Katwijks rappelere), meh dat zien losse flodders. En daan gelt wel: iech daon 't allein es iech get te vertèlle höb. Zoe'n artikel zal good en substantieel zien, of 't zal neet zien. Dus es iech nog ins e beukske euver 't Hulsters in han krijg ofzoe, daan leef iech miech oet, aanders neet. Wijer höbste daan nog roej links nao taolkundege terme. Iech kin bij God neet zègke of iech die gaw gaon invölle. Mesjiens doen aander taolgeriechte gebrukers dat wel; iech bin hei neet d'n einege dee dao-euver sjrijf.
 Daan reste nog e paar muzieklinks. Op ziech is hiphop mesjiens wel d'n urgentste roeje link vaan allemaol (dus neet gelèt op umstendeghede op perceis dees Wikipedia). Iech haw neet zoe vaan deze stijl; aon d'n aandere kant höb iech toch genoog informatie um 't aon te make. En wee wèt kump iemes aanders dao wel mèt. Ouch euver Ivan Heylen zouw iech nog wel get kinne sjrieve. Iech höb e tiedsje trök ins get euver Nederlandstaolege popmuziek gesjreve (kinnes oet mien scriptie). Ivan Heylen heet toen neet 't gelök gehad mèt opgenome te weure, meh dat kin nog koume. Andy Sierens heet bij miech minder prioriteit, meh wee wèt völt 'ne Belsj dat dit jaor ins in?
 Alles bijein kin me zègke tot in dit artikel gein superurgente roej links zitte. Es v'r de prominenter artikele (nege Belzje gemeintes, drei muziekdinger) aonmake, daolt 't aontal roej links vaan 30 nao 18 en geit 't aontal ingevölde links umhoeg nao 36, ofwel 2/3 vaan alle gelinkde pazjes in dit artikel.

dus...

Wie iech al ieder zag raak dit artikel zjus aon e paar good gedocumenteerde oonderwerpe: dialek, geografie en muziek. Aander oonderwerpe zien minder bedeild: beeldende kuns, sport en zeker natuurwetensjap. (Gelökkeg zien ouch die laank neet oonbesjreve, en zitte hei ouch dao-euver experts.) Oondervertegewäördeging vaan ein of aander categorie is natuurlek noets good. Toch dink iech tot de casus vaan dit artikel aongief tot 't wel good zit mèt de Limburgse Wikipedia: es v'r al op eilendsjes wèrke, zien die eilendsjes wel vrij groet en good oonderhawwe. Es v'r veural mer gestructureerd en systematisch te werk goon, zal 't mèt d'n inhaajd wel good koume.

Mesjiens ziet g'r 't hei neet mèt ins? Of höb d'r aonvöllinge? De euverlègkpaasj is ope :-).