Dialektsjriever Will Kohnen, geboare i Vols, 1951. Han óch (mit mieng vraw, oet Viele) zes joar i geneumde plaatsj gewoand, noe al joare i Lemieësj. Ich sjrief al vanaaf mie elfde/twelfde joar. Nit alling in 't Hollensj, óch gedichte en kótte verhale sjrieve in 't dialekt vóng ich sjun. Vanaaf 2000 sjrief ich sjtreekromans in 't dialekt. Ich han mierdere verhale en gedichte in e weëkblad gesjreëve. Giddes weëk ing aaflivvering van de 'Bende van 't Zuide' verdeeld i zesentswantsig kier. Vur 't bóch han ich twei hoofdsjtukker extra d'rbeej gesjreëve. Doanoa kómp 't verhaal "Woa is 't Eefje?", dat is óch uvver mierdere weëke gepubliceerd. Noaderhand han ich dat verhaal umgesjreëve en als titel vur mie dreide bóch gebroekt: 9 verhale mit d'r titel: "Woa is 't Eefje? en ach anger verhale". D'r chique umsjlaag, noa e aquarel van F. Kohnen-Heijenrath, en beej giddes verhaal ing tekening. Ich sjrief zoe realistisch meugelik, óch al zunt de verhale fictief. Mieëstal zunt 't detektieveverhale, meh romantiek en humor zunt nit vergeëte. 't Tweide bóch "De geheimzinnige Viela" is e bietje thrillerèchtig woade en umdat doa kinger i mitdunt, egelik e bóch vur gidderinge. Ich han de bucher zelf oetgegevve. Ich sjpreëk en sjrief 't Vieleter dialekt, 't zal wel d'rmit te make ha dat mieng mam va Mellesjet woar. Nevver 't sjrieve, bin ich óch dök an 't fotografere in ós sjtreek. Gedichte sjrieve, ving ich nog ummer sjun, ze mótte waal inge bepaalde 'deepgank' ha.