Gaston Jacobs
- Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Meersjes, es te dit dialek sjpriks.
Gaston Jacobs is 'ne zenger en kapper oet Ulestraote dae bekandj steit es de "zingendje kapper oet Ulestraote". Hae haet mitgedaon aan mieëder finaals van 't Limburgs Vastelaovesleedjes Konkoer, en zelfs twieë kieër 't kónkoer prizzenteerdj. Ei van zie bekandjste nómmers is "Mèt zestig jaor".
Gaston woort op zien 8ste lid vanne fómfaar Concordia, wo d'r trómpet en slaagwerk speeldje. Medio jaore tachentig dieëj d'r mit aan 't lokaal vastelaovesleedjeskónkoer vanne karnevalsverein de Kuitebietersj. In 1986 dieëj d'r veur 't ieës mit aan 't LVK mit 't leedje "Nao esjgoonsdig kinne v'r sjlaope" (plaats: 11). In 1996 haoldje d'r de finaal weer mit "Jónger es vandaag" (plaats: 11); in 1997 woort t'r twieËdje mit 't leedje "Aan de gang (mèt miene rammelesjang)". 't Jaor daorop wón d'r 't LVK in Wieërt mit "Opzie, opzie, opzie". Mitte leedjes "Veur gein miljwan" (2000) en "De mós 't preuve" (2001) haoldje d'r nag de twieëdje plaats op 't LVK.