Gangmaekers
Dit artikel is gesjreve (of begós) in 't Haels. Laes hie wie v'r mit de versjillende saorte Limburgs ómgaon.
Vastelaoves Vereniging De Gangmaekers oet 't Midde-Limburgse Hael (gemeindje Maasgouw) besjtóng in 1999 3 x 11 jaor. Ze is dus ópgerichtj in 1966. Det beteikentj äöverigens neet det t'r in Hael pas vastelaovendj besjtuitj sinds det jaor. De aojst bekèndje uting van dit volksfieëst in Hael sjtamtj al oet 1897. Toen al versjeen ein gans in 't dialekt gesjreve vastelaovesgezèt. Oet dae tied datere ouch de ieërste berichte ueëver optochte op vastelaoveszunjig.
Toet aan de twieëdje werreldjoeërlog waerdj wisselendj melding gemaaktj van optochte, bals, konserte en dergelikke op de drie daag väör as-woonsdig. Al dees aktiviteite woeëre neet georganizeerdj, tenminste, neet door ein vastelaovesvereniging. Ein dergelikke vereniging ontsjtóng pas in 1946. Dees vereniging haaj de naam "D'n Draak", eine naam dae verwees nao de drakelegende van Hael. In de jaore '30 waerdj zelfs ein Drakesjpel opgeveurdj, gesjreve door Panhaeldenieër pater Jacques Schreurs, landelik bekèndj door zien "dagboek van een herdershond". Dees ieërste vastelaovesvereniging organiseerdje bóntje aovendje en optochte en goof ein vastelaovesgezèt oet. De ieërste Raod van Èlf waas op de ieërste plaats ein club van vrunj. Het absolute hoeëgtepuntj van V.V. de Gangmaekers is väörluipig de organisatie van ’t Groeët BCL Carnavalstreffe in 2005.
Anno noe organisere De Gangmaekers jaorliks de volgendje activiteite:
De Leedjesmiddig: vintj al in oktober plaats. De drie hoeëgst geëindigdje leedjes gaon door nao de finale in november. Dees drie leedjes kómme ouch op de Gangmaekers CD te sjtaon.
Gangmaekers CD: Jaorliks laote de Gangmaekers de drie finaliste van 't leedjeskonkoer professioneel op cd zètte. 't Ieërste exemplaar van dees cd waerdj op de Nacht van de Gangmaeker officieel aangeboeëje aan eine persoeën dae väöl beteikendj (hieët) väör de Haelder Vastelaovendj in 't algemein en de Haelder sjlagers in 't biezunjer.
Ueëpening seizoen en Nacht van de Gangmaeker: tijdens deze aovendj (m.m.v. artieste oet Hael en de res van de provincie) waerdj 't vastelaovesseizoen geueëpendj en vindj de finale van 't Haels leedjeskonkoer plaats.
Prinsebal: traditioneel de ieërste zaoterdig nao 1 jannewarie. Aafsjeid van de aoje Prins, beneume van de Gangmaeker van 't jaor en 't oetrope van de noewe Prins.
Bóntje Aovendje: de Gangmaekers organisere twieë bóntje aovendje, m.m.v. oetsjloetendj Haelder artieste.
Baeremiddig: bóntje middig väör en door de Haelder jeugd.
Häötemetäötegeträöt: m.m.v. de häötemetäöte (hotemetote) onger de Limburgse zate hermeniekes, joekskapelle etc.
Vastelaovesgezet D'n Draak: ein van de aodste (1897) vastelaovesgezette van Limburg, gemaaktj door eige redactie en volgesjreve door eige "journaliste", waerdj hoes aan hoes verkóchtj.
Prinseresepsie: de Gangmaekersprins recipieertj traditioneel de zunjig väör vastelaoveszunjig.
Sjläötelueëverdracht: de Vastelaovesvereniginge van de gemeinte [Maasgouw] treffe elkaar tijdens dit evenement op de vriedig väör de vastelaovendj.
Vastelaovesdeenst: vastelaovendj is van oorsprong ein katholiek fieëst en dao hueërtj väör de Gangmaekers ein Deenst in de Haelse St. Stephanuskirk biej, aan de väöraovendj ('s zaoterdigs) van de vastelaovendj. In dees Deenst sjpele eige tekste en leedjes van de Gangmaekers ein groeëte rol.
Pekskesaovendj: Ein vastelaovesbal m.m.v. artieste oet Hael en de res van de provincie. De aovendj woeëop de vastelaoves-pekskes väör de ieërste kieër ge-showd kènne waere.
Groeëte Optocht: trèktj op vastelaoveszunjig door de sjtraote van Hael.
Klonetrèkke: de kinjer van Hael waere op vastelaovesmaondig in de kefees gesjminktj en getrakteerdj. Ouch de aojers hove zich neet te vervaele.
Kinjeroptocht: De Gangmaekers toekomst trèktj op vastelaovesdinsdig door de sjtraote van Hael. Later dae daag is d´r ein Pyamabal väör alle jóng Gangmaekerkes en daonao trueëtj de Jeugdprins aaf.
Aafsjloeting vastelaovendj en Groeëte Waever: óm twelf oer precies, waerdj "Oppe Linj" de Waever gedanstj en daomèt is de vastelaovendj gedaon.
Mieër informatie: [www.gangmaekers.nl]