Gabriël
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Ingel Gabriël, Gabrièl of Gabriel[1] (Hebreeuws: גַּבְרִיאֵל; Aajdgrieks: Γαβριήλ; Arabisch: جبريل, Jibrīl/Jebriel of جبرائيل, Jibrā'īl) is 'nen eerstingel binne alle Abrahimistische religies, dus in 't geluif vaan de Jude, de Christene en de Mohammedaone, mer ouch kleiner religies wie die vaan de Jezidi's.
In de Juudse Thora versjijnt Ingel Gabriël in 'nen droum vaan profeet Daniël um zien ierder druime oet te lègke. Same mèt d'n eertsingel Michaël weurt Gabriël in de Torah besjreve es de besjermingel vaan Israël mèt es opdrach um 't Juuds volk te besjerme contra ingele vaan aander volker.
In Lucas, ein vaan de belaangriekste gesjrifte vaan 't Christelek Nui Testamint, weurt Gabriël in verband gebrach mèt de Annunciatie (of Aonkondeging). Hei versjijnt Gabriël veur Zacharias en Maria en veurspeld aon hun respectievelek de geboortes vaan Johannes d'n Duiper en Zjezus Christus. Binne väöl Christeleke tredities weurt Gabriël gezien es 'nen Heilege, wie de Oosters-Orthedoxie, 't Roems-Kathelicisme en versjèllende struiminge binne 't Prottestantisme. In de Kathelieke kèrk is 29 september zienen Heilegedaag. Väöl Kathelieke Roezekranse rifferere nao Ingel Gabriël. In 'ne kribstal, traditioneel veur väöl Christene tijes Keersmis, weurt dèks Gabriël aofgebeeld.
In d'n Islam weurt Gabriël (Jibril) gezien es d'n eertsingel dee gesjik is door God (Allah) nao versjèllende profete touw, oonder mie Mohammed. De ierste vief veerse vaan de Al-Alaq ('t 96e hoofstök vaan de Koran) weurt door Mohammedaone gezien es de ierste veerse die door Gabriël zien getoend aon Mohammed.
De Jezidi's zien Gabriël es ei vaan de Zeve Raodsels, 't Heileg Raodsel wat door God de touwstömming heet gekrege um veur de Minseleke Wereld te zörge. Soms weurt Gabriël gezien es sömpelweeg ein vaan de versjèllende versjijnsele die Melek Taus (ein vaan de centraol figure vaan de Jezidi-religie) aonnömp.
- Op 't Cimetière américain in Henri-Chapelle steit e beeld vaan Gabriël, boe-in heer 'ne lauwerekrans touwwerp
- 't kloester Rolduc in Kèrkraoj is touwgeweid aon Gabriël
Brón
bewirk- Ingelstaoleg Wikipedia-artikel: Gabriel
- ↑ Gabriël op 't Nederlands, Gabriel zoonder umlaut op 't Duits en Frans en Gabrièl es verawwerde benaoming