Fibrodysplasia ossificans progressiva
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
 | Lèt good op 't veurbehawd bie medische informatie. Gank bie gezóndjheidsklachte nao 'nen hoesdokter. |
Fibrodysplasia ossificans progressiva (FOP), vrie euvergezatte: "bindjweefsel det progressief wuuertj ómgezatj in knaok", is 'n zeldjzaam genetische aandeuning wobie knaok wuuertj gevörmp in spiere, peze, gewrichsbenj en anger bindjweefsel. d'n Extra knaok dae wuuertj aangemaak wuuertj gevörmp door progressieve ómzètting van bindjweefsel in knorch en knaok. Dit gebeurtj oppe zelvendje meneer es wen knaok weer wuuertj aangemaak nao 'ne breuk (genaezing). Ouch is 't percès bao identiek ane meneer worop knaok wuuertj gevörmp in 't embryo. 't Abnormaalt ane knaokvörming bie FOP is dus neet de meneer worop d'r wuuertj gevörmp, meh de plaats ennen tied worop d'r óntsteitj. 't Lief vanne patiënt perduceertj es 't waar 'n extra skelèt, verhelling van 't zaach bindjweefsel. De knaokvörming vindj ouch plaats rónjelómme gewrichte zoeadet die nimmieë kónne functioneren en op slaot kómme te zitte. 't Oetènjelik rizzeltaot is det luuj mit FOP gans "verknaoke", zoeadet ze ènjigen in 'n bepaoldje positie wo ze nimmieë kónnen oetkómme.
De gekrenkdje sting vreuger bekèndj es myositis ossificans progressiva (MOP), mer ómdet behauve spieren ouch anger zaach bindjweefsel wie peze d'rbie betróch zeen woort de naam in 1970 verangerdj.