Euroscepticisme

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Euroscepticisme, Euroscepsis of EU-scepsis meint polletiek kritiek op de Europese Unie (EU) en 't Europees integratieperses. Dees kritiek kin breid of specifiek zien. Es 't kritiek gief op instèllinge vaan de EU, op pan-Europese policy of op krie reie euver meugelek hervörming vaan de EU, sprik me dèks vaan zach Euroscepticisme of Euro-/EU-realisme. Es me contra 't gaans idee vaan 'nen EU-lidstaot is, sprik me dèks vaan hel Euroscepticisme, anti-Europeanisme of anti-EUisme. Tegeneuver 't Euroscepticisme steit 't pro-Europeanisme, wat ouch-wel EUisme of Eurofilie weurt geneump. De lèsten term weurt ummertouw dèks door zelfverklaore pro-Europeaniste es 'ne mietersnaom gezien.

't Gief e breid scala aon ideologische bronne veur Euroscepticisme. Die ideologieë gaan vaan wiedrechs nao wiedlinks mer ouch mie centristische polletieke ideologieë kinne Eurosceptisch zien.

• 't nationalistisch geluif tot 't Europees integratieperses de nationaol soevereiniteit vaan de natiestaot verzwaak
• 't democratisch geluif tot de EU te elitair is en krie democratische legitimiteit en transparantie dreug
• 't libertair geluif tot de EU te bureaucratisch en däör is veur belastingbetaolers
• 't ethnonationalistisch geluif tot migratie oonwönselek is veur 'ne natiestaot en tot de EU migratie te väöl opstangk
• 't socialistisch geluif tot de EU 'n te neoliberaole organisatie is die de bourgeoisie deent in plaots vaan 't prolitariaot

Eurobarometer, 't statistiek bureau vaan de EU, laot zien tot 't 'n sjerp daoling veur veurstendersjap veur de EU goof vaanaof 2007. Daonao bleef veur langen tied 't veurstendersjap oonder de 50%. In 't Vereineg Keuninkriek (VK) loog 't veurstendersjap. Dat is neet opvallend, umtot 't VK bekans alle jaore sinds 't Brits touwtreijing bis de EU de meis Eurosceptischen EU-lidstaot is. e Rifferendum in 2016, wat bekind góng staon es de Brexit, zörgde d'r veur tot 't VK mèt 51,9% stömde véúr 't verlaote oet de EU. 't VK verleet de EU op 31 jannewarie 2020. Sinds 2015 is 't veurstendersjap in de meiste EU-lidstaote evels gaon greuie - get wat door väöl sociologe woort oetgelag es rizzeltaot vaan de greuiende ikkenemie en wèrkgelegenheid. In 2019 leet Eurobarometer zien tot 68% vaan de EU-börgers veurstenders zien vaan de EU. Dat is 't hoegs percentaasj sinds 1983 en daomèt 't liegs Euroscepticisme sinds dat jaor.