Brexit
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De Brexit is 't eweggaon van 't Vereinig Keuninkriek (dat wil zigke Groeat-Brittannië, Naord-Ierlandj en Gibraltar) oete Europese Unie op 31 jannewarie 2020.
d'n Achtergróndj vanne Brexit is 't rifferendum euver 't EU-lidmaotsjap van 't Vereinig Keuninkriek (VK) op 23 juni 2016, toe 51,89% vanne kezers aangove de EU te wille verlaote, dewiel 48,11% juus inne EU wól blieve. Opmirkelik is det in Sjotlandj, Naord-Ierlandj en Lónjen en ómgaeving veural blievers zote, dewiel de anger gebiede veural verlaoters hawwe.
In mieërt 2017 höbben 't Leger- en 't Hogerhoes 'n wèt aangenómme veure regering te mechtige te óngerhanjelen euver 't oettraeje van 't VK oete EU. Dees wèt woort op 16 mieërt 2017 ratificeerdj dore keuningin.
De óngerhanjelingen euver 't oettraeje van 't VK begóste formeel wie de Britse regering artikel 50 van 't Verdraag betreffendje de Europese Unie haet aktiveerdj. Dees bepaoling is van kraf wore wie 't Verdraag van Lissabon in 2009 van kraf woort. De aktivering van artikel 50 waas op 29 mieërt 2017.