Eugène Martineau

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.

---

Eugène Julien Martineau

Eugène Julien Martineau (Haerle, 14 mei 1980) is 'ne Nederlandjse tieënkamper woonechtig in Kirchrao. Hae woort pes noe toe eine keër Nederlandjs kampioen en haet zich óntwikkeld tot ein van de bèste Nederlandjse meërkampers oats. Op de Nederlandjse Top 10 Aller Tieje ranglies bezèt hae allewiel de veerde plaatsj. Martineau naom tweë keër deil aan de Olympische Sjpele.

Biografie

Aafkóms en sjtart

Martineau zien awwesj zint aafkómstig van Aruba, mer zelf is Eugène Martineau gebaore in Limburg. Es zösjaorig jungske sjtarde hae mèt judo mer sjtapde ènnige jaore later, ouch es gevolg van ein verhoezing, euver op atletiek. Hae woort lid van atletiekvereiniging Achilles-Top in Kirchrao en wiej al gaw bleek dat mèt name de väölziejigheid van de atletieksjport häöm aantrok koos hae bewus veur de meërkamp waas dan ouch ein bewuste keus. "Het mooie van die meerkamp is dat je twee dagen bezig kunt zijn met steeds weer een nieuw onderdeel. Als het ene wat minder gaat, kun je dat daarna proberen goed te maken," stelt Eugène.

Wiej al gaw bleek dat hae es meërkamper väöl talent haw kroog hae biej Achilles de Duutsjer Joachim Schultz, dae zelf awt-meërkamper waas gewaes, es hooftrainer. Schultz hej ein trainingsgruupke vlak euver de grens en ómdat die zelf allein mer ein gravelbaan hejje gónge ze traine biej Achilles en woort Schultz dao de clubtrainer.

Zien eësjte opvallende tieënkampprestatie op ein belangriek internationaal toernooj leverde Martineau in 2001 biej de Europese kampioensjappe veur atlete ónger de 23 jaor in 't Amsterdamse Olympisch Sjtadion. Mèt ein PR-totaal van 7507 puntje woort hae dao achste. Ein jaor later waas hae riep veur 't groate werk, mèr biej de Europese kampioensjappe in München góng 't al biej 't tweëde nummer, 't versjprènge, mis. De Limburger blesseerde zich, góng nog waal door, mer hej nao de eësjte daag zoaväöl klachte, dat hae de tweëde daag noadgedwónge aan de kantj moosj blieve.

Olympische Sjpele

In 2004 waas Eugène Martineau lid van de Nederlandjse ploog veur de Olympische Sjpele in Athene, woveur hae zich eërder dat sezoen mèt ein nuuj PR-score van 8082 puntje in Götzis ruumsjoats hej geplaatsj. Hae sjtóng mèt die prestatie inmiddels dertieënde op de waereldranglies. In Athene góng Martineau mèt ein perseuënlik bèste 100 maeterprestatie van 10,99 veurtvarend van sjtart. Des te groater waas de teleursjtèlling, wiej hae biej 't derde nummer, 't kogelsjtoate, geine geljige wórp wis te producere. Daodoor veel hae truk tot de 29e plaatsj. Hiej kaom hae neet meë vanaaf, óndanks ein tweëde PR van 15,02 op de 110 maeter horde aan 't begin van de tweëde daag. Martineau eindigde op ein totaal van 7185 puntje.

In 2005 bleef de prestatiecurve van de Limburgse meërkamper wiejer oploupe. Allereësj woort hae in mieërt biej de Europese indoorkampioensjappe in Madrid op de zevekamp achste mèt ein record aantal puntje van 5766, ónger meë achter Chiel Warners die hiej mèt 6055 puntje en ein veerde plaatsj heël good presteerde. Vervolges bleek ouch Götzis häöm weer gunstig gezind, want op 29 mei 2005 verbaeterde Martineau dao opnuuj zien perseuënlik bèste tieënkampresultaat oats, deze keër tot 8114 puntje. Drie jaor lank is dit zien bèste score gebleve. Mèt dit resultaat zat hae zichzelf ouch nog èns op de veerde plaatsj in de Nederlandjse Top 10 Aller Tieje. Toch góng 't ènnige maonje later veur de derde keër mis op 't belangriekste toernooj van 't jaor, de waereldkampioensjappe atletiek in Helsinki. Geplaog door kaw, raenge en wèndj sjlaagde Eugène d'r neet in óm ein resultaat neer te zette bij 't polssjtekhoagsjprènge door drie mislökde poginge. Mèt eine opsjpelende hamsjtring besjlaot hae vervolges de sjtried te sjtake.

Goed resultaat in Göteborg

't Jaor daonao sjödde Eugène Martineau aevel alle opgeloupe trauma’s oet veurgaonde internationale kampioensjappe van zich aaf en kaom hae biej de Europese kampioensjappe 2006 in Göteborg mèt ein èlfde plaatsj en 8035 puntje tot ein heël verdeenstelik resultaat.

Jaomer genóg begoosj 2007 weer in mineur. Biej de Europese kampioensjappe indoor in 't Èngelsje Birmingham in mieërt verrekde hae biej 't versjprènge biej zien eësjte poging eine hamsjtring en moosj hae deep teleurgesjtèld de sjtried opnuuj veurtiejig sjtake. De teleursjtèlling waas des erger, ómdat hae op 't eësjte nummer, de 60 m, mèt ein PR van 7,09 net zoa good waas begoosj. Ómdat ’t hersjtèl lang zoerde moosj hae ouch nog de Nederlandjse kampioensjappe meërkamp laote sjete, mer begin juli waas hae d'r biej de wedsjtrieje óm de Europa Cup in Tallinn weer biej. Mèt name door zien toedoon eindigde Nederlandj es derde achter winnaer Wit-Ruslandj en Frankriek. Mèt ein viefde plek en 7877 punten waas Eugène Martineau in deze wedsjtried ouch nog de beste Nederlanjer in 't individueel klassemènt.

Martineau bleek dus op tied te zeen hersjtèld en koosj zich opmake veur ’t waereldkampioensjap 2007 in Osaka, woveur hae zich op basis van zien resultaat op 't EK in Göteborg al hej gekwalificeerd. In Osaka sjloog 't noadlot aevel alweer toe. Aan 't eindj van de eësjte daag kroog hae biej 't lètste óngerdeil van de eësjte daag, de 400 m, opnuuj las van ziene hamsjtring, mer noe in 't anger bein es in Birmingham. Behanjeling door 't medisch team moch neet bate en de óngelökkige Limburger moosj aan 't begin van de tweëde daag de sjtried sjtake. Hae sjtóng op dat mement op de 22e plaatsj. Wat ein heuëgdepuntj in de atletiekloupbaan van Martineau hej mótte waere, woort zoa opnuuj ein teleursjtèlling.

Toewirke nao eine climax

Martineau begoosj 't olympisch jaor 2008 röstig. Hij wouw 't risico van ein vreug blessure zoaväöl meugelik veurkómme en beperkde zich ónger 't indoorsezoen tot deilname aan individueel nummersj. In die periood besjtede hae sjpeciaal zien aandach op 't polssjtekhoagsjprènge en dat leverde häöm biej de Nederlandse kampioensjappe indoor atletiek 2008 in Gent zoawaor nog ein brónze medajje op. Vervolges sjtónge tweë trainingssjtages gepland, ein in Sjpanje gevolg door ein op Tenerife, dees lètste same mèt de olympische selectie van de Atletiekunie. 't Vizier waas intösje gerich op de jaorlikse Internationale Hypo Meeting in Götzis eindj mei, wo Martineau ein sjtartbewies veur de Olympische Sjpele hoopde te veraovere. En inderdaad leverde hae dao eine tieënkamp aaf dae baeter waas es oats: mèt ein score van 8161 puntje verbaeterde hae zich ten opzichte van zien eërder in Götzis gerealiseerd pr-totaal oet 2005. De olympische lemiet laog aevel zègke en sjrieve 5 puntje hoager en Eugène Martineau greep wat Peking betruf dus mis. Ein tweëde poging waas neuëdig en die óngernaom de dónkere Limburger drie waeke later in 't Duutsje Rotinge. Deze keër leet hae d'r gaar geine twiefel meë euver besjtaon en mèt ein heël good resultaat van 8233 puntje, inclusief drie perseuënlikke records op individueel nummersj en ein evenaring, verzekerde hae zich van ein ticket nao Peking. Hae koosj zich hiejnao in alle rös gaon veurbereije op 't tweëde olympische optraeje oet zien atletiekloupbaan.

OS Peking: doel niet bereikt

Op de eësjte daag van de olympische tieënkamp in Peking raegende ’t beheuërlik wiej de tieënkampersj aan hun eësjte óngerdeil begoosjte. Dit doerde tot ’t derde nummer, 't kogelsjtoate. Ouch al óm die raeje bleef Martineau op alle óngerdeile get ónger zien p.r.-niveau en sjloot hae dae daag aaf mèt 4002 puntje en ein neugetieënde plaatsj. Op de tweëde daag wis Martineau zich veural door zien gooj prestaties biej de werpnummersj (mèt de sjpeer kaom hae zelfs tot ein p.r. van 71,44 m) tot ein veërtieënde plaatsj op te wirke. Hej hae ouch zien p.r. biej 't polssjtekhoagsjprènge (5,00 m) wat meë weite te benaojere (noe sjpróng hae 4,70m) dan hej hae misjiens nog korter in de buurt van de top tieën terech kènne kómme. Zien doel dat hae zich van teveure hej gesjtèld, finishe biej de eësjte tieën, woort mèt zien totaalscore van 8055 punten neet bereik. Wo hae aevel biej diverse vurrige gelaegeheje ziene meërkamp veurtiejig moosj aafbraeke waeges ein blessure, of ein ónger de maotse prestatie op ein van de óngerdeile, brach Eugène Martineau ziene wedsjtried dees keër waal tot ein gooj eindj.
Dees positieve óntwikkeling zouw de basis kènne vorme veur nog baetere prestaties in de toekoms. Eine meërkamp mèt es resultaat van mee es 8500 puntje zouw, reakening hawtend mèt zien p.r.-prestaties, besjlist tot de meugelikheje motte heuëre.

WK 2009

In 2009 waas alles vanzelfsjpraekend gerich op de waereldkampioensjappe atletiek die in augustus zouwe plaatsjvènje. Op basis van zien prestaties in Peking waas Martineau veurgeselecteerd en hoofde hae in de loup van 't sezoen allein mer vormbehawt te toane. De B-limiet van 7730 punten waas hiebiej maotgaevend.

Allereësj trooj hae begin fibberwarie aan veur eine zevekampinterlandj tösje Nederlandj, Sjpanje, Tsjechië, Frankriek en Groat-Brittannië in 't Sjpaanse Zaragoza. Hiej moosj hae de sjtried aevel nao vief óngerdeile sjtake vanwaege ein vootblessure. 't Hersjtèl hiejvan plus ein femieliereünie op Aruba ware de oarzaak dat hae zich op de Nederlandjse kampioensjappe indoor neet leet zeen. Op de Europese kampioensjappe indoor in Turien waas hae d'r aevel weer biej en eindjigde hae op de zevekamp es neugende, wobiej hae zien perseuënlik record van 5776, veer jaor eërder in Madrid gevestig, opviezelde nao 5884.
Veur 't voldoon aan de WK-limiet richde Eugène Martineau zich daonao, net es biej veurgaonde gelaegeheje, op de jaorlikse Hypo meeting in Götzis, eindj mei. En opnuuj mèt succes. Hae realiseerde d'r zien doel ruumsjoats, want mèt 8083 puntje finishte hae zelfs es bèste (neugende) van 't drietal Nederlandjse tieënkampersj, van wae Eelco Sintnicolaas en Ingmar Vos ouch de WK-limiet haolde, dae veur hun op 8000 puntje laog. Martineau drejde in Götzis zoo ’ne goje wedsjtried, dat hae d'r zelfs van baalde op vief puntje de belangrieke achste plaatsj te höbbe gemis.

Hiejnao naom de Limburger in zien veurbereijinge veur Berlien allein mer aan wat individueel wedsjtrieje deil. Zoa waas hae op de Nederlandse kampioensjappe atletiek 2009 actief op 't polssjtekhoagsjprènge, wó-op hae mèt 4,72 es achste eindjigde. In Berlien leverde Martineau op de tieënkamp ein degelikke prestatie. Hae drejde beheuëlik mit, kaom biej 't versjprènge en 't sjpeerwerpe tot PR-prestaties, mer moosj biej 't polssjtekhoagsjprènge genoege numme mèt 4,80m, naodat opnuuj eine hamsjtring waas gaon opsjpele. Hae koosj de wedsjtried nao tweë lang, aafmattende daag aevel volbrènge en eindjigde mèt 8055 puntje es 19e, ein plaetske veur landjgenaot Ingmar Vos, dae ziene tieënkamp mèt 8009 puntje aafsjloot.

Sjtatistieke

Perseuënlikke records

Outdoor

Óngerdeil	Prestatie	Datum	Plaatsj
100 m	10,96 s	28 mei 2005	Götzis
400 m	48,58 s	29 mei 2004	Götzis
1500 m	4.27,34 s	2 juli 2006	Yalta
110 m horden	14,37 s	22 juni 2008	Rotinge
hoagsjprènge	2,06 m	10 augustus 2006	Göteborg
versjprènge	7,41 m	19 augustus 2009	Berlien
polssjtekhoagsjprènge	5,00 m	29 mei 2005	Götzis
kogelsjtoate	14,06 m	23 mei 2009	Hoorn
discuswerpe	45,00 m	22 juni 2008	Rotinge
sjpeerwerpe	71,44 m	22 augustus 2008	Peking
tieënkamp	8233 p	21/22 juni 2008	Rotinge

Indoor

Óngerdeil	Prestatie	Datum	Plaatsj
60 m	7,09 s	3 mieërt 2007	Birmingham
1000 m	2.40,21 s	1 fibberwarie 2004	Zuidbroek
60 m horden	8,27 s	1 fibberwarie 2009	Zaragoza
hoogspringen	2,06 m	5 mieërt 2005	Madrid
versjprènge	7,40 m	7 mieërt 2009	Turien
polsstokhoogspringen	5,00 m	8 mieërt 2009	Turien
kogelstoten	13,80 m	31 jannewarie 2004	Zuidbroek
zevenkamp	5884 p	7/8 mieërt 2009	Turien

Prestatieóntwikkeling meërkamp

Jaor	Tieënkamp	Zevekamp
2001	7507	4987
2002	7681	5330
2003	7633	-
2004	8082	5598
2005	8114	5766
2006	8035	5659
2007	7877	-
2008	8233	-
2009	8.083	5884

Opboew PR meërkamp en potentie op basis van perseuënlikke records

In de tabel sjteit de oetsjplitsing van 't perseuënlik record op de tieënkamp. In de kolomme d'r naeve sjteit ouch 't potentieel record, mèt alle perseuënlikke records op de losse óngerdeile en de biejbeheuërende puntje.

	Oetsjplitsing PR			Potentieel record
Óngerdeil	Prestatie	Puntje		Pers. record	Puntje
100 m	11,17	823		10,96	870
versjprènge	7,27	878		7,41	913
kogelsjtoate	13,24	682		14,06	732
hoagsjprènge	1,99	794		2,06	859
400 m	49,25	849		48,58	881
110m horde	14,37	927		14,37	927
discuswerpe	45,00	767		45,00	767
polshoag	5,00	910		5,00	910
sjpeerwerpe	70,09	891		71,44	911
1500 m	4.35,04	712		4.24,10	784
Puntjetotaal		8233			8554

Brónvermeldinge

• Kort, T. de (2001), Van speerwerperszoon tot meerkamper, Atletiek Actueel nr. 14: KNAU
• Bijkerk, T. (2004) Olympisch Oranje De Vrieseborch ISBN 90-6076-522-2
• Werkgroep Statistiek KNAU (2002 t/m 2008) Statistische jaarboeken 2001 t/m 2007 KNAU
• Website KNAU, 2007
• Werkgroep Statistiek KNAU (2008, 2009) Statistische jaarboeken Indooratletiek 2006/2007, 2008/2009 KNAU
• Roeske, E., Kleijn, T. de, Kortleever, W. en Leeuwen, E. van (foto's) (2009) Dutch Athletics Team EK Indoor Torino Atletiekunie
• Roeske, E., Kleijn, T. de, Kortleever, W. en Leeuwen, E. van (foto's) (2009) Dutch Athletics Team WK Atletiek Berlijn 2009 Atletiekunie

Externe links

• IAAF profiel
• Profiel op SR/Olympics
• Profiel op de website van Atletiekwereld.nl
• Profiel op WereldVanOranje.nl