Einpertiesjtaot

Dit artikel is gesjreve (of begós) in 't AGL. Laes hie wie v'r mit de versjillende saorte Limburgs ómgaon.

---

'nen Einpertiesjtaot, 'n einpertiesisteem of 'n einpertiesjtilsel is e polletik sisteem en 'n tiep einheidssjtaot (ofwaal unitaire sjtaot) woe-in ein polletike pertie es einsigste 't rech haet óm zich 'n regering te vörme, aone 't permetere van oppositiepertieë.

De sjtaotspertie is alzoe de einsigste executieve mach en, door häör executief monopolie, ouch dèks de einsigste legislatieve en judicieel mach. 't Geuf, in anger wäörd, gein sjeit van de mechte en gein modern democratie.

Verkezinge höbbe 't karakter van sjienverkezinge, woebie 't ein lies geuf mit eventueel perzent blokpertieë. 't Besjtaon van blokpertieë verangert ivvels niks aan 't karakter van 't einpartiesjtilsel.

Allewiel ekzempels van offesjeel einpertiesjtaote zin allemaol op pepeer communistisch, wie Sjina, Cuba en Naord-Korea, mit oetzunjering van Sahrawi, wat de-facto euver de Westelikke Sahara regeert. Syrië en Cambodja zin offesjeel gein einpertiesjtaote, mer in de praktiek waal.

D'n iersten einpertiesjtaot waor 't Osmaans Riek van 1913 bis 1918.