Eckerö

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Eckerö is 'n eilandj en gemèndje in Ålandj, Finlandj. 't Eilandj ligk 't wèstelikste van alle gemèndjes van Finlandj. De gemèndje haw 942 inweuners op 31 mieërt 2016 en 'n landjoppervlakdje van 107,72 km², van 'n totaal (inclusief water) 752,67 km². De bevoukingsdiekdje is 8,59 luuj de km². De plaatse die inne gemèndje ligke zeen: Storby (de houfplaats), Hummelvik, Marby, Överby, Kyrkoby, Torp, Eckerö, Björnhuvud, Skeppsvik, Söderlund en Skag. Middels 'n korte brögk is Eckerö verbónje mit Hammarland (op 't houfeilandj van Ålandj).

Eckerö is 'n echte toeristebestumming mit väöl restaurants, hotels, pensions, campings, kaffees en verkansjeparke. De gemèndje besjik euver zandjstrenj, e pos- en doeaanmuseum, e jach- en vèsjeriemuseum, 'n historisch aopelóchmuseum, 'ne meiboum enne steine St.-Larskirk oete veertieëndjen ieëf; dees haet 'n klein kirkklok, die ouch de aadste van Finlandj is.

De naam van 't eilandj mèntj "akkereilandj".

Toete gemèndje behuuertj 'n aantaal aan sjaeren en eilenj, en ouch e bewóndj sjiereilandj det toete middelieëve oet drie apaarte eilenj besting, meh dore posglaciaal ophöffing allewiel aaneingegreudj zeen.

De bewóndje eilenj van de gemèndje zeen: Emskär, Högsten (mit baken), Skarven en Torpön. Wiejer bevindj zich inne gemèndje 't óndeep Storbrotten, 't netuurrizzervaat Träsket same mitte waterstraot Käringsund. Finbofjärden en Marsund sjeien 't eilandj Eckerö van Hammarland.

De gemèndje is einspraokig Zweeds. De gemèndjecode is 043.

Demografie

In 2016 woor de laeftiedsverdeiling van de bevouking es völg:

0 toet 14: 12,9%
15 toet 64: 60,2%
65 en ajer: 25,1%

De spraokverdeiling woor in 2016 det 90,3% vanne bevouking 't Zweeds es ieëste spraok haw; 4,8% haw 't Fins es ieëste spraok en 4,9% haw 'n anger ieëste spraok. Hie-ónger völg de demografische óntwikkeling vanaaf 1980.

1980	1985	1990	1995	2000	2005	2010	2013
685	769	811	823	830	925	943	952