Meiboum

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

'ne Meiboum is 'nen ómgezaegdje boum dae me herpaotj (of duit oprichte) es 'n vorm van traditie. Dit kump veur in groeate deiler van Europa, worónger in Limbörg. 't Guldj van aadshaer oet es 'n traditie veur vröchbaarheid veur ane begin vanne zomer de netuur te höljige. Me geluifdje det 't paote vanne boum lèdj toet vröchbaarheid veur 't vieë, de akkeren enne luuj. 't Paote vanne meiboum is in sómmige plaats nag ummer 'n hieël laevendj ritueel det gepaardj geit mit fieëstelikheje.

'ne Meiboum hoof neet extra 'ne boum te zeen, mer hae kan ouch 'ne versierdje paol zeen. Bie 't oprichte vanne boum guuef 't versjillige rituele, die versjille de gebied. De boum wuuertj döks gepaotj op 1 mei; in Mofert waere de meibuim meistes de litste zóndig van april opgezatj.

In sómmige plaatse, wie Mofert, waere mieëder meibuim opgezatj op versjillige plaatsen in 't dörp en neet slechs eine. De meibuim in Mofert zeen ummer dennebuim. Wen 't aafhaole vanne boum in begin junie beurtj, den vindj 't meiboumzaege plaats. Dit hèltj in det versjillige gruup taengenein strieje veur mit 'ne gemiddeldjen tied 't flotste de stökker vanne meiboum aaf te höbbe gezaeg.

In Zuud-Limbörg wuuertj in väöl dörper nag eder jaor 'nen den gepaotj (juus wie innen Eifel). Dit beurtj döks dore plaatselike sjötterie, dae meistes paotj bie wo de sjöttekeuning wóntj. In Valkeberg wuuertj d'n den daobie gestaole ofwaal geklawdj oete bós dore jónkheid ('n verein van óngetroedje manskaerele) "Boete de Paort". Hae wuuertj good bewaak zoeadet anger jónkheje dem neet staelen en op 30 april wuuertj de meiboum rechgezatj op 't Grendelplein, óngerane Cauberg. Op daen daag waeren ouch de "meikeuningin" en 't "meipaar" oetgerope. Ouch in anger plaatse wuuertj 'ne meiboum gepaotj, wie in Sjilvend, wo gedoerendje twieë waeke 'ne stried plaatsvindj tösse de meivereine "De Jonkheid"en "De Getrouwden" veur 't bezit vanne dennestaak.