Kleinen eecheltenrek

(Doorverweze van Echinops)

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


De kleinen eecheltenrek.
't Gebied wo de kleinen eecheltenrek veurkump.

De kleinen eecheltenrek (Letien: Echinops telfairi) is 'n saort aan zougdere vanne tenrekfemielje. 't Is de ènsigste saort van 't geslech Echinops. De saort is inheimsj op Madagaskar en zie netuurlik laefgebied besteit oet subtroeapische en troeapische druueg busj, struukgebieden en lieëglandjgraasgebieden en druueg savanne.

De kleinen eecheltenrek is e klein, diek-geboedj bieësjke det väöl eweghaet vannen eechel. De stert is kórt, de lidmaoten enne snoet zeen van gemiddeldje lingdje enne oeare zeen prominent. De ganse rögk is bedèk mit sjerpe stekele. De kläör is gewuuenlik vaalgaeltsig, meh sómmige bieëster zeen bao wit en anger bao zwart. De kop-lieflingdje is 13 toet 17 cm en 't bieës waog zoeaget 200 g.

De kleinen eecheltenrek ras zich euverdaag ónger 'ne boumstam of in 'nen haole boum; ouchal zeen buim hieël erg oetgewejdj in 't netuurlik gebied. Mit werm waer sluuep 't bieësjke in 'n oetgerèkdje posiesje; angesters ras 't zich gans opgeroldj. 't Duit aan torpor inne wintjer. Ze veuje zich veurnamelik mit insekte, mer ouch klein gewerveldje. Gebrukelik doon ze det allein, behauve de mam mit zien jónge.

Taxonomie bewirk

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Kleinen_eecheltenrek&oldid=392704"