Daudebardia rufa

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Ezer, es te dit dialek sjpriks.

---

Daudebardia rufa (Draparnaud 1805) in 'n slek oet de femilie Oxychilidae (Glansslekke). Ze kump veural veur in Midde-Europa en op de Balkan, meh weurt ouch daoboete gezeen. De slek heet nog geine triviaole naom in 't Nederlands of Limbörgs.

'n Exemplair vaan Daudebardia rufa.

Besjrieving

Daudebardia rufa is 'n haafnaaksslek, mèt e sterk geridduceerd huiske boe ze op gein stökker nao in pas. De lengde vaan 't huiske, wat drei kier umlöp, is zoeget 5,5 mm, dewijl 't bies zelf tösse de 16 en de 20 mm groet is. De kleur is blauwgries, in weerwèl vaan de naom (rufa 'roedbroen'). 't Bies leef deils oondergroonds en jaog dao op larve, kleinder slekskes en pieringe.

Veurkoume in Limbörg

Allewel tot de soort goodddeils beperk is tot Midde-Europa, is ze al ins gezeen bij Aoke en zelfs in Groet-Brittannië (woersjijnelek es exoot). Op 11 november 2020 woort de soort veur 't iers in Nederland gezeen, en wel bij de Eyserbeek.

De slek kin op eige krach in Limbörg zien gekoume, meh 't kin ouch zien tot de eikes zien aongeveurd in bouwstein, beveurbeeld die zien gebruuk bij d'n aonlag vaan 't Mieljoenelijntsje. 't Is in eder geval geine 'klimaatopsjuiver' dee ziech door de opwerming vaan 't klimaot nao 't noorde verplaots, wat bij nui soorte in Nederland dèks 't geval is.

Bron

• Ingelstaoleg artikel
• Nature Today