Coen Moulijn

Dit artikel is gesjreve (of begós) in 't Oeals. Laes hie wie v'r mit de versjillende saorte Limburgs ómgaon.

---

Sjtandbeeld Coen Moulijn veur 't Feijenoord-sjtadion

Coenraadt (Coen) Moulijn (Rotterdam, 15 fibberwarie 1937 - Rotterdam, 4 jannewarie 2011) waas eine Nederlands voetballer. Hae sjpeeldje vanaaf midde jaore vieftig toet begin jaore zevetig es linksboete biej Feyenoord en 't Nederlands elftal.

Clubvoetbal

De klein van sjtök zeendje Moulijn debuteerdje op zien zeveteendje voor de Rotterdamse club Xerxes, wo hae Faas Wilkes in zien jeug zoog voetballe. Hae waas maar 1 maeter 72 en woog 62 kilo, maar de linksbinne toondje aan euver talent te besjikke. In'ne zomer van 1955 koch sjtadsgenoot Feyenoord de dribbelaer veur 28.000 gölde, destieds ein groot bedraag. Mit dit bedraag kaapdje de sjtadionclub de sjpeler weg veur de naas van häöre rivaal Sjparta.

In zien beginjaore waas Moulijn ongriepbaar. 't ware zien béste jaore. De boetesjpeler, waas uniek. Zien opkomst in 't sjtadion waas altied apaart. Alle sjpelers van Feyenoord lepe keurig in ein rieke nao de middesjtip, Coen neet. Hae kwaam altied es letste oet de sjpelerstunnel en huppeldje ein paar maeter achter zien collega's aan. Hae haaj altied ein te grote boks aan en sjtreek mit de henj döks naeve de elasjtieke bandj.

Mr. Feyenoord

Moulijn is onlosmakelik verbonje mit Feyenoord. Hae sjpeeldje 487 keer in 't eerste elftal, womit hae rekorhaajer vanne club is. Op 't plein veur sjtadion Feijenoord (De Kuip) sjtuitj sins 2009 ein laevesgroot sjtandjbeeld vanne beroemdje linksboete, dae zien club altied troew is gebleve.