Carla Beurskens
Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.
Carolina Alwina Hubertina (Carla) Beurskens (Tegele, 10 fibberwarie 1952) waas vanaaf 't eindj van de jaore zevetig pès wied in de jaore neugetig van de vörige eëuw 'n veuraansjtaonde Nederlandse atlete op alle aafsjtènj vanaaf 3000 m tot en mèt de marathon. Op dit lètste nummer waas ze zelfs geruume tied toanaangaevend.
Meis succesvolle Nederlandse atlete oats
bewirkWiezeër Beurskens alle aspecte van 't metier beheërsjte, bliek oet de verdeiling van de drieëntwintig nasjenale titele die zie gedoerende häör lang carrière in de wach sjleipte: drie op indoor- en vief op outdoorbane, neuge op de waeg en zös op de veldjloup. Zie is op de lange aafsjtènj verreweg de meis succesvolle Nederlandse atlete oajt.
De lengde van häör atletiekcarrière in oagesjouw nummend kaom Carla Beurskens sjlechs op ein relatief gering aantal groate kampioensjapstoernooje veur Nederland oet. Tweë keër naom zie deil aan de Olympische Sjpele (in 1984 en 1988), driemaol aan de Europese- en eine keër aan de Waereldkampioensjappe. Óm oeteinloupende raejene ware d'r veur häör op die toernooje gein groatse dade weggelag. De viefde plaatsj op de marathon biej de Europese kampioensjappe 1982 in Athene waas de hoagste plek die ze oats bereikde bie dees wedsjtriede.
Groate marathons
bewirkBaeter vergóng |t Beurskens op de marathons van de versjillende groate waereldsjtaej. Zoa is zie, op de Keniase atlete Tegla Loroupe nao, de ènnige die de marathon van Rotterdam biej de vrouwluuj meë dan èns gewónne haet. En dat terwiel zie kort nao häör eësjte euverwinning in 1984 verklaorde dat zie Rotterdam veurtaan lènks zouw laote ligke, tenziej me de situatie veur vrouwelike deilnummers drastisch zouw verbaetere. In 1990 voldege de ómsjtandigheje bliekbaar baeter aan de veurwaarde van de Limburgse, want zie trooj d'r opnuuj aan en góng weer mèt de wins sjtrieke. Daobiej waas zie de eësjte vrouw die in Rotterdam 'ne tied bènne de twee en 'n hauf oer realiseerde: 2:29.47.
In 1986 hèj Beurskens wille deilnumme aan de marathon van Londen, mèr 'n sjtartverbod, häör opgelag door de KNAU, verhinjerde dat. Me wouw häör ein waek veuraafgaond aan de marathon van Rotterdam gein toesjtömming gaeve, ter besjerming van 't Nederlands kampioensjap dat dao plaatsjvónj. Prónt koos Beurskens veur de marathon van Boston, die ach dagen nao Rotterdam woort gehauwe. Dao hèj zie zich ingesjreve ónger de naam Sue Whitemouth, zoadat zie es vedette gein mement door boetesjtaonders gesjteuërd zouw waere. Ze hèj zich prima veurbereid en wouw good veur de daag kómme. In Boston daalde 't parcours aevel eësj sjterk, óm vervolges heuvelopwaerts te veure. Nao 10 km laog ze daodoor al 2 minute veur op häör sjema, dat op 'ne eindjtied van 2:20 waas gerich. Zie leep aanvankelik ouch in op de Noorse koploupster Ingrid Kristiansen. 't Tweëde, heuvelopwaertse sjtök verwoesde aevel völ van häör krachte, wodoor zie oetentelik in 2:27.35 es tweëde bie de vrouwe finishde. Kristiansen wón in 2:24.55.[1]
Carla Beurskens leep häör persoanlik en teves nasjenale record van 2:26.34 op 15 november 1987 in de marathon van Tokio, wo zie es tweëde eindigde achter drievoudig winnares Katrin Dörre oet Oas-Duutsjlandj. Dit record zouw dertieën jaor es Nederlands record euvereindj blieve. Pas in 2003 woort dit door Lornah Kiplagat in de New York City Marathon nao 2:23.43 trökgebrach. Wiejer sjreef zie euverwinninge op de marathon op häöre naam in 't Japanse Nagoya in 1987, in 'n, gezeen de ómsjtandigheje (óngerwaeg ènnige sneëbuuje), oetsjtaekende 2:28.27, in Eindhoven in 1995 en in Enschede in 1997.
Honolulu
bewirkVeur altied zal Beurskens häöre naam aevel verbónje blieve aan de marathon van Honolulu op Hawaï. Van de tieën keër dat zie daor aan de sjtart versjeen, góng zie mèr leefs ach keër mèt de hoagste eër sjtrieke. De eësjte keër leep zie d'r in 1985. De oetneuëdiging veur deze wedsjtried góng vergezèld van 'n tweëwaeks vakantieaanbod. Zónger volledige veurbereiding naom zie deil en prónt wón zie. Vervolges woort häör zegereeks op Hawaï tot en mèt 1994 allein in 1988 en 1991 óngerbraoke. Mèt häör ach euverwinninge is zie d'r de meis succesvolle marathonloupster oats. Door de wedsjtriedorganisatie wirt zie taengewoordig es eëregas veur de wedsjtried oetgeneuëdig.
Nederlandse kampioensjappe
bewirkOutdoor
| óngerdeil | jaor |
|---|---|
| 3000 m | 1977, 1981 |
| 5000 m | 1981, 1982 |
| 10.000 m | 1981 |
| 15 km | 1981, 1982, 1986, 1987, 1988 |
| hauve marathon | 1992 |
| marathon | 1981, 1994, 1995 |
| veldjloupe (lange aafsjtand) | 1980, 1981, 1982, 1984, 1985, 1986 |
Indoor
| óngerdeil | jaor |
|---|---|
| 3000 m | 1979, 1980, 1981 |
Perseuënlike records
bewirkBaan
| Óngerdeil | Prestatie | Datum | Plaatsj |
|---|---|---|---|
| 3000 m | 9.08,32 | 2 augustus 1982 | Pescara |
| 5000 m | 15.46,20 (ex-NR) | 27 juni 1985 | Oslo |
| 10.000 m | 32.28,28 (ex-NR) | 27 juli 1985 | Oslo |
Waeg
| Óngerdeil | Prestatie | Datum | Plaatsj |
|---|---|---|---|
| 15 km | 48.36 | 9 november 1986 | Lissabon |
| hauve marathon | 1:08.56 (ex-NR) | 21 september 1986 | Grevenmacher |
| 25 km | 1:27.10 (NR) | 7 mei 1989 | Berlien |
| marathon | 2:26.34 (ex-NR) | 15 november 1987 | Tokio |
Marathon-euverwinninge
bewirk- Marathon van Honolulu: 1985, 1986, 1987, 1989, 1990, 1992, 1993, 1994
- Rotterdam Marathon: 1984, 1990
- Marathon van Frankfurt: 1985
- Marathon van Nagoya: 1987
- Marathon van Eindhoven: 1995
- Marathon van Enschede: 1997
Euverige euverwinninge
bewirk- City-Pier-City Loop: 1984, 1985, 1986, 1990
- Hauve marathon van Egmond: 1986, 1990
- Groet Uit Schoorl (21,1 km): 1998, 1999
- Trosloop: 1990, 1992
- Route du Vin halve marathon: 1986
- Dam tot Damloop: 1986, 1988, 1989
- Twintig van Alphen (15 km): 1984, 1985, 1986, 1987, 1990
- Zevenheuvelenloop: 1989, 1990
- Parelloop: 1993
- Oostende-Brugge Ten Miles: 1997
- Greifenseelauf: 1985
- 4 Mijl van Groningen: 1992
- Marikenloop: 2006
Óndersjeijinge
bewirk- KNAU atlete van 't jaor - 1982, 1985
Brónne, brónvermelding
bewirk- Stalman, R. (1986) Profiel van Carla Beurskens. Atletiekwereld nr. 5: KNAU
- Ploeg, H. v.d. (1987) Programma Carla Beurskens nog een groot vraagteken. Atletiekwereld nr. 4: KNAU
- Redactie AW (1988) Vooruitblik Seoul Atletiekwereld nr. 14: KNAU
- Bijkerk, T. en Paauw, R. (1996) Gouden boek van de Nederlandse Olympiers. De Vrieseborch
- Schoor, L. v.d. (1998) Carla Beurskens, het boegbeeld van de vrouwenmarathon. Atletiek nr. 2: KNAU
- Werkgroep Statistiek KNAU (2008) Statistisch jaarboek 2007 KNAU
- Wikipedia NL, Carla Beurskens
- ↑ Oet Carla Beurskens door Theo Reitsma (1999), gepubliceerd in De Top 500, De beste Nederlandse sporters van de eeuw Premium Press BV Publishers ISBN 90-76574-04-9