Caecilia

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Caecilia ies 'n heilige en martelares in de Roams-Katholieke Kèrk. Zie zou in de derde ièw nao Christus in Roame de marteldoad gesjtorve zin. Caecilia ies de petroanheilige van de muziek en van de blinne. Häöre fièsdaag ies op 22 november.

Legende

Extase van de heilige Caecilia, Rafaël, 1514

Caecilia zou oet 'n veurnaam Romeins gesjlach, 't gens Caecilia, sjtamme. Zie houw in 't geheim 'n gelofte van maagdelikheid aafgelag en ziech tot 't christendóm bekièrd. Door häör ouwersj woort zie gedwónge te trouwe mèt 'ne heidense man, Valerianus. Zie bekièrde häöre man en ziene broor Tiburtius. Mèt zien drieje dege zie väöl gooj dinger en bekièrde ze väöl luuj tot 't christendóm. Wie ze weigerde aan de heidense gode te offere woorte ze ter doad veroordeild door de prefek van Roame. Caecilia woort in 'n kokend bad in häör hoes op Trastevere gezat, meh euverlaefde diet. Oeteindelik woort door 'ne soldaot mèt 'n zjwaerd geprobeerd um häöre kop d'raaf te houwe, meh zie euverlaefde de drie sjlaeg (officieel mochte d'r neet miè gegeve were) en sjtorf drie daag later.

Caecilia's associatie mèt de muziek kump oet de besjrieving van häör leve in de Passio Caeciliae oet óngevaer 500 nao Christus. Hie-in sjteit dat Caecilia in häör huweliksnach in häör hart zóng veur God um häör te helpe häör maagdelikheid te beware, terwiel instrumente sjpeelde. In later bewèrkinge en vertalinge ies "in häör hart" neet euvergenómme, woadoor 't leek of de heilige zelf gezónge zou höbbe. Caecilia's band mèt de blinne kump van häöre naam; 't Latiens woord caecus beteikent "blind".

Verièring

In Roame ies de kèrk Santa Cecilia in Trastevere aan häör gewiejd. De kèrk zou geboewd zin op de plaats woa Caecilia gesjtorve zou zin.

Väöl kèrkkoare zint nao Caecilia geneump. Ouch hermenieje, fanfares en ander muziekgezelsjappe drage häöre naam.

Kuns

Caecilia weurt aafgebeeld mèt 'n örgel, harp of 'n ander muziekinstrument en mèt 'n paumetekske.

'n Bekènd marmere beeld van häör bevink ziech in de Santa Cecilia in Trastevere; dit beeld ies gemaak door Stefano Maderno en zou de heilige aafbeelde in de positie woa-in me häör vóng wie häör graaf in 1599 geëupend woort.

D'r zint ouch muzieksjtökker geïnspireerd door Caecilia, bieveurbeeld Ode to St. Cecilia van Henry Purcell, Hymn to St. Cecilia van Benjamin Britten en Messe Solennelle de Sainte Cécile van Charles Gounod.

Externe link

Commons: Saint Cecilia – Media gerelateerd aan dit óngerwerp