Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


'n Modern konzèrharp of dobbelpedaolharp.

'n Harp is e samegestèld snaorinstrumint mèt snaore die mèt de hand weure getokkeld en die vrij trille tösse twie resonatore. Heimèt versjèlt ze vaan de femilie vaan luitinstruminte, boe de snaore parallel aon 't klaankbord loupe. De Hornborstel-Sachscode vaan de harpe is 322 (snaorinstruminte - samegestèld - harpe). Me kin ze wijer indeile in ope harpe (zoonder zuil; 322.1) en geslote harpe (achter de liegste snaor steit 'n zuil; 322.2). Harpe koume euver de ganse wereld in diverse meziekculture veur. In de westerse meziek woorte ze väöl gebruuk in de middeliewe (oonder mie door de troubadours). In de barokmeziek waore ze väöl minder belaankriek. E probleem bij 't bespeule vaan 't instrumint waor de oonmeugelekheid um chromatisch te speule. Dit woort opgelos mèt oetvindinge wie de haokharp en later de pedaolharp. De lèste oetvinding, roond 1800 gedoon, heet de harp 'n positie in 't symfonie- en operaorkes opgelieverd. Ouch in d'n avant-gardemeziek en de popmeziek weurt 't instrumint soms veurgesjreve. 't Solorippertoire veur de harp is veural, meh neet allein, 't werk vaan componerende harpiste gewees. 't Instrumint weurt allewijl vrij väöl op amateurbasis gespäöld, veural door meidskes en vrouwlui.


  Dit artikel is e sjtumpke. De kans Wikipedia helpe door 't aan te völle

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Harp&oldid=412028"