Australisch hierevoetbalèlftal

(Doorverweze van Australisch voetbalèlftal)

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Australisch hierevoetbalèlftal, bijgenaomp de Socceroos, vertrejt Australië in internationaol voetbalmatche.

Voetbal is in 't land neet d'n ierste sport. Oonder football versteit me in 't land ieder Australisch voetbal. Ouch cricket en rugby zien zwoer concurrente. Toch heet 't team, zeker sinds 2000, good gepresteerd en mèt regelmaot 't wereldkampioensjap bezoch. D'n Australische voetbalboond (FFA) waor vaanajds aongeslote bij de OFC (de federatie vaan Oceanië), meh vèlt allewijl oonder d'n Aziatischen AFC.

Historie bewirk

 
Australië in zienen ierste match, oet tege Nui-Zieland. Australië zouw de match mèt 3-1 verlere.

Voetbal kaom al hiel vreug mèt Britse koloniste (zoewel gestraofde es vrijwèllege) en toerende teams nao Australië. In de ierste jaore sloog de sport evels neet breid aon en woort 'r allein sporadisch gedoon. Pas in 1911 woort 'ne voetbalboond opgeriech, de Commonwealth Football Association. Die woort in 1921 vervaange door de Australian Soccer Association.

De ASA begós mèt 't opriechte vaan e nationaol team, wat op 17 juni in Dunedin tege Nui-Zieland späölde (zuug heineve). de match góng mèt 3-1 verlore. Ouch de decennia dao-op zouw Australië, wat dèks tege aander kolonies en dominions späölde, wieneg succes behole. In 1955 kraog 't in eige hoes zèlfs e 0-8 verlees tege Zuid-Afrika te verwèrke. In 1956 tuinde 't team ziech aon de res vaan de wereld, wie 't deilnaom aon de Olympische Speule in Melbourne. Ouch dao presteerden 't neet väöl. 'n Belaankrieke rei um neet aon groete toernoje mèt te doen waor de isolatie vaan 't land: lochreize waore oongemein deur en euver zie doort 't weke tot maond um aon te koume.

In 1966 sjreef Australië ziech veur 't iers veur e WK in; 't kwalificeerde ziech evels neet. Dat gebäörde einmaoleg wel in 1974. Daonao bleef 't WK veur Australië laank boete bereik. Oceanië heet (ouch noe nog) mer 'n haaf plaots op 't WK; ouch de kampioen vaan die regio moot dus iers nog vaan 'n aander land winne um mèt te doen. In 1966, 1970, 1986, 1994, 1998 en 2002 won 't land edere kier de kwalificatie veur Oceanië, meh stuitden 't in de play-offs ummer op e sterker land. Binne Oceanië waor Australië, zeker vaanaof 1980, wel oppermechteg. Tösse 1980 en 2004 won 't veer kier d'n OFC-beker. D'n insegste serieuzen tegestand kaom vaan Nui-Zieland. Tegen 't èlftal vaan Amerikaans Samoa haolde Australië in 2001 zelfs 'ne wins vaan 31-0 (mèt neet minder es èlf gole veur Archie Thompson allein al), e wereldrecord veur voetbalinterlands.

In 2005 besloot Australië de OFC te verlaote en ziech bij de AFC aon te slete. 't Voetbalteam had ziech toen al mèt 'ne play-off tege Uruguay veur 't WK vaan 2006 geplaots. Op dat WK woort 't team gecoach door de Nederlander Guus Hiddink. Australië bereikde oetindelek de achste finaal; nog ummertouw hun bèste rizzeltaote oets op e WK. Veur de WK's vaan 2010 en 2014 wiste ze ziech wel te plaotse, zoe good wie veur dat vaan 2018. Heibij waor obbenuits 'ne Nederlander de coach: Bert van Marwijk, dee Mark van Bommel es assistent had. Ouch in de AFC is Australië ein vaan de sterker teams. In 2015 woort 't land kampioen vaan Azië.