Adolf van der Marck

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

---

Adolf ll van der Marck (augustus 1288 - Clermont-sur-Meuse 3 november 1344) waor va 1313-1344 preensbisjop va Luuk en 'ne zoon van Everhard l van der Mark en Irmgard van Limburg of Berg, die 'n dóchter waor van Hendrik lV va Limburg en 'n jónger zeuster van Walram lV, d'r lètste hertog van Limburg.

Adolf van der Marck waor 'ne autoritaire heerser nao 't väörbeeld va Filips de Schone va Fraankriek. Z'n legiste howwe 't Romeins rech doeë herlaeve, dat alle mach toekènde an 't centraal gezag in d'r persoon van d'r vorst. Dizze preensbisjop wól zoewaal de patriciërs, es de ambachte ónderwerpe en e waoërt daodör ömmer mieë gehaat. Wie e ooch nog de rechterleke mach in z'n heng woolt centralisere, óntsjtóng 'n coalitie va alle Luukse sjtaej, gesjteund dör d'r adel. Dit leidde töt 'ne gewapende ópsjtaand en d'r bisjop vlöchde nao Brabant. In Fexhe-le-Haut-Clocher sjtóng 't leger van de coalitie taegenöver dat van d'r preensbisjop. D'r hónger haat de twieë legers oeteindelek oetgepöt. 't Lambertuskapittel van Luuk sjtèlde dao-op vör te bemiddele in ónderhandelinge, die leidde töt de Vraej va Fexhe in 1316.