Abdij va Sinnich

Dit artikel is gesjreve in 't Norbiks. Ómdat 't plaatsgebónge is, maogs doe 't ómzètte nao 't Teuves, es te dit dialek sjpriks.

D'r väörmalège Abdij va Sinnich liegkt in 't buurtsjap Sinnich in Teuve en waor bies d'r Fraanse tied 'n Augustinesse Damensjtift väör adeleke dames. D'r abdij waoërt gesjticht vanoet Rolduc in d'r 11de ieëw. D'r oorsjronkeleke taoëre van de kapel is Romaanse; d'r kruusgaank in 't noordelek deel 16de ieëwse. D´r 18de ieëwse vläögel is van de haand van d'r Aokense architekt Johann Joseph Couven. In d'r Fraanse tied waoërt d'r abdij gecónfisceerd en verkóch. Huutsedaag is d'r abdij èègendóm van 'ne Hóllendsje industrieel dae 't gaans complex verantwoord gerestaureerd haat.

Abt Heyendal va Rolduc bewirk

Jaorelaank goof 't cónflicte tösje de zösters van Sinnich en Rolduc. Rolduc verwaeët Sinnich gebrek an tucht en de zösters verwaeëte de abte hön rigorisme. D'r inzat waore nuuj en sjtrenger sjtatute, die d'r evvel noeëts kieëme. De religieuze va Sinnich hele voot bie sjtök en lete zich dör Rolduc de wèt neet väörsjrieve. Wie abt Heyendal mèt 't jaor 1700 de Annales Rodenses aafsjluut dèèt-e dat mèt 't vólgende verbitterde gekuum: In Sinnich is alles erbermelek, 't gèsselek laeve is dao al lang doeëd en óp sjtóffelek vlak liegkt 't óp sjterve. Sinnich is oongenaeslek kraank. D'r is gènge prior oet ós abdij of ènge of andere monnik dae die funktie vervöld. [1]

In 1703 besjlete de zösters väörtaan allèng nog mer dames van d'r ówwe adel óp te naeme.

Referentie bewirk

  1. De abdij Kloosterrade-Rolduc, Joep Offermans, 2003

Externe leenk bewirk

Kesjtieël Sinnich mèt gerestaureerde froontgèvel van J.J. Couven

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Abdij_va_Sinnich&oldid=397349"