AH-64 Apache

Dit artikel is gesjreve (of begós) in 't Oeals. Laes hie wie v'r mit de versjillende saorte Limburgs ómgaon.

Doordet Lockheed de kans om eine nuuje aanvals- en verdedigingshelikopter te boewe haaj weggegooidj, moogdje Hughes Helicopters eine helikopter boewe. Dit toesjtel, de HH-44 maakdje häör eerste vluch op 30 september 1975. In'ne eerste maondje van 1984 waerdje Hughes Helicopters euvergenomme door McDonnell Douglas Corporation en det waerdje op zien beurt later weer euvergenomme door Boeing, daorom hétj 't toesjtel taegewoordig Boeing AH-64 Apache. 't Toesjtel vervèngt de AH 1 Cobra dat saer 1967 in gebroek waor.

Kinmerke

De Apache kan biej eeder type waer vleege, aanvalle en verdedige. Ouch kan 't toesjtel heel erg lang sjtilhange op ein plaats door de nuuj technieke die gebroektj waere. Dit is uniek veur eine helikopter omdet ze normaal de lochsjtruim neudig höbbe om de sjtaolmotors te keule. De motors van 't toesjtel zitte vrie ver oet ein. Dit is zo gedaon om te veurkomme det es d'r eine motor geraaktj weurdj door ein raket det 't toesjtel ouch geliek sjtuurloos is. 't Toesjtel is door de gebroekdje stealth ontwerp technieke vriewaal onzichbaar veur radar.

D'r waerdje ouch ein type (AH-64C/D) gemaaktj dae eine sjterkere motor kreeg en baeter waas bewaopendj. Dit toesjtel kreeg ouch ein moderner, digitaal cockpit, ouch waal "glass cockpit" genumpdj. 't C-type is de ein persoons-versie, 't D-type de twee-persoons-versie. 't Toesjtel haetj heel väöl missies gevlaoge in de beide golfoorloge en noe ouch in Afganistan. 't Toesjtel duitj ouch deens biej de Keuninklikke Lochmach en is gestationeerdj op Lochmachbasis Gilze-Rijen in Braobantj.

Nederlandj besjloot in 1991 toet de oprichting van ein Lochmobiel Brigade. Veur de helikopters mos ein keuze waere gemaaktj tösse de Tiger van Eurocopter en'ne Apache AH-64D. 't Eerste toesjtel waas neet direct besjikbaar. Nederlandj leasdje vervolges eers 12 Apache AH-64A's en besjteldje 30 sjtöks Apache AH-64D. Dees zeen noe dus gesjtationeerdj op'pe Lochmachbasis Gilze-Rijen in 't 301 Squadron plus 930 fase ongerhaad squadron. De radar dome dae de Fire Control Radar (FCR) bevatj maaktj gein onderdeil oet van'ne Nederlandse Apaches wodoor dees geine Longbow genumpdj moge waere. In 2001 waerdje veer sjtöks euvergebrachtj nao Djibouti, veur de vredesoperatie in Ethiopië. In 2004 en 2005 zeen zes Apaches ingezatj in Irak missie SFIR. Vanoet hun thoesbasis Tallil ongersjteundje ze de Nederlandse troepe. Ouch in Afghanistan (ISAF) waere de Nederlandse Apaches momenteel - väölvuldig - ingezatj. Eers vanoet Kabul (2004) later op Kandahar Airfield (2006) en noe (2007) vanaaf Tarin Kowt (Uruzgan). Eine Apache ging verlaore in Afghanistan (2004) nao ein fout van'ne vleger.

3D-aanzich
Aan'ne grondj mit waopes
Amerikaanse helikopterpilote sjeete op vijandelikke Iraqi's vanoet ein Apache helikopter

Commons

Op de pazjena AH-64 Apache van Wikimedia Commons zeen media gerelateerd aan dit óngerwerp te vènje

Technische gegevens:

Lengte: 15 m.
Totaal breidte: 14,65 m.
Heugte: 4,65 m.
Kruutssjnelheid: 295 km/u
Vleegbereik: 1890 km.