't Bildt
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
| 't Bildt (Het Bildt) Gewaeze gemeinte in Nederlandj | |||||
| |||||
| Gevörmp | 1505 | ||||
| Opgehaeve | 2018 | ||||
| Opgegange in | Waadhoeke | ||||
| Provincie | Friesland | ||||
| Hoofplaats | Sint Annaparochie | ||||
| Opperflaakde (bie opluffing) | 116,48 km² | ||||
| – daovan water: | 24,11 km² | ||||
| Inwoeners (kort veur opluffing) | 10.610 (8-2017) | ||||
| – deechde: | 115/km² | ||||
| Lies van börgemeisters | |||||
't Bildt (officieel Nederlands: Het Bildt; Fries: It Bildt) is 'ne polder en 'n geweze gemeinte in de Nederlandse provincie Friesland, aon de Waddezie. De gemeinte umvatde de kerne zien Minnertsga (Minnertsgea, pas sinds 1984), Nij Altoenae, Oudebildtzijl (Ouwe Syl), Sint Annaparochie (Sint Anne) en Sint Jacobiparochie (Sint Jabik). Minnertsga huurt neet bij 't polderlandsjap 't Bildt meh ligk op 't aajd land.
Historie
bewirk't Bildt waor 't lèste reske vaan de Middelzie, 'ne zie-erm dee oets tot deep in Friesland doordroong, meh in de loup vaan de late middeliewe bitsje bij bitsje ingepolderd woort. Aon 't begin vaan de zestiende iew beslote hertóg Sjors vaan Sakse en de Hollandse hiere vaan Wijngaarden 't Bildt ouch in te poldere en te exploitere. Veur de inpoldering en de kolonisatie gebruukde me achhoonderd wèrkers, die veur e deil oet d'n Alblasserweerd kaome (woe de hiere vaan Wijngaarden hiersde) meh ouch oet Friesland en de res vaan Holland. Daodoor spreke de inwoeners vaan 't Bildt nog ummer gei Fries, meh Bildts, e Hollands-Fries mingdialek wat nogal op 't Stadsfries liekent. In de zeventiende en achtiende iew bleef 't gebeed greuje doortot me aongespeulde kwelders ouch weer bediekde. Dit perces vaan landaonwinning in klein bittekes geit aon de Friese en Greuningse kös trouwes tot op d'n daag vaan vendaog door.
In 1984 woort 't dörp Minnertsga, tot daan deil vaan de aw gemeinte Barradeel, ouch bij 't Bildt geveug. Dit dörp is Friestaoleg en besteit al zeker doezend jaor. Op 1 jannewarie 2018 góng 't Bildt op in de nui fusiegemeinte Waadhoeke.