Zuudpoeal
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De zuudpoeal van 'n planeet is geografisch gezeen 't zujelik sniejpuntj vanne drejjingsas mitte oppervlakdje. Veure aerd ligk dit puntj op 't continent Antarctica. De basis Zuudpoealstaasje Amundsen-Scott bevindj zich hie. Deze basis wuuertj 't gans jaor lang bezatj door óngerzeukers.
De ieëste luuj die de geografische zuudpoeal bereikdje ware de Noor Roald Amundsen en zien groep op 14 dieëtsember 1911.
Doordet de aerd besjik euver e magnetisch veldj is ouch spraok vanne geomagnetische zuudpoeal, dae netuurkóndig gezeen oppe aerd 'ne magnetische naordpoeal is. Aangezeen de richting van 't magnetisch veldj op langer termien ónstabiel is, is de locatie vanne geomagnetische zuudpoeal neet vas. In 1008 loog de geomagnetische zuudpoeal op 137° 51' 45" OL, 64° 31' 38" ZB. De plaats, richting en sterkdje van 't magnetisch veldj verangere kónstant. Aventoe truuedj boetedet 'nen ómslaag van 't magnetisch veldj op: 'n ómwusseling vanne (netuurkóndige) magnetische naord- en zuudpoeal. De litste kieër det det is gebeurdj is zoeaget 780.000 jaor trögk.
't Waord "zuudpoeal" wuuertj ouch in brei zin gebroek veur 't gebied det rónjelóm de zuudpoeal ligk.