Ziews-Vlaondere
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Ziews-Vlaondere (Nederlands Zeeuws(ch)-Vlaanderen) is 't deil vaan de Nederlandse provincie Zieland wat zuielek vaan de Westerschelde ligk en neet oet (geweze) eilen daan wel sjiereilen besteit, meh oet vasteland. 't Geit um de gemeintes Sluis, Terneuzen en Hulst. In de middeliewe bestoont dit gebeed veural oet eilendsjes, boetösse oondepe sjorre en slikke laoge. In 't gebeed oontwikkelde ziech versjèllende klein stedsjes, wie Sluis, Sint-Anna-ter-Muiden, Oostburg, Aardenburg, IJzendijke, Biervliet, Hugevliet (verdwene), Axel en Hulst. Staotkundeg hoort 't toen bij Vlaondere, dewijl de res vaan Zieland dèkser tösse Vlaondere en Holland wisselde. Roond 't ind vaan de middeliewe woorte de versjèllende slikke ingepolderd, boedoor 't gebeed vasteland woort. In d'n Tachtegjaoregen Oorlog wisselde 't e paar kier vaan eigeneer, meh bij de Vrei vaan Munster (1648) kaom in 't Nederlandse han. 't Waor e Generaliteitsland oonder de naom Staots-Vlaondere. Bij de Fransen inval vaan 1795 mós de nui gevörmde Bataafse Rippubliek 't land aofstoon aon Fraankriek, meh bij de bevrijing (1813) kaom 't weer bij Nederland; noe ouch woort 't definitief bij Zieland geveug. In 1918 maakde 't Belsj nog aonspraok op 't gebeed, wat evels door de groete Geallieerde machte woorte aofgeweze. Tot 2003 waor 't lendsje vaanoet Nederland allein mèt de boot te bereike; sindsdeen evels ligke de Westerscheldetunnel tösse Zuid-Beveland en Terneuzen. Me kin 'n cultuurgrens trèkke, die oongeveer löp tösse de gemeintes Sluis en Terneuzen aon d'n eine kant en Hulst aon d'n andere: in 't weste zien de lui protestants (dèks streng gerifformeerd) en spreke ze Ziewse/Wes-Vlaomse dialekte, in 't ooste zien de lui roems-katheliek en spreke ze Oos-Vlaoms. Terneuzen is de insegste plaots mèt e steidelek karakter; hei zien oonder mie havewerke en sjemische industrie gevesteg.
In Ziews-Vlaondere woene 106.161 lui (03-01-2013). In 't zuie grens 't aon de Belzje pervincies Wes-Vlaondere en Oes-Vlaondere. In 't noorde door de Westerschelde (ouch wel de Honte geneump). Terneuzen is de groetste stad; ze is verboonde mèt Gent via e kanaol. De N61 en N62 zint de belangriekste weeg vaan 't gebeed. De N61 (de rieksweeg vaan Terneuze nao IJzendijke) is drök in de zoemerverkansie door 't vakansverkier vaan en nao plaotse aon de zie wie Cadzand en Nieuwvliet. De N62, de rieksweeg vaan Borssele, aon d'n euverkaant vaan de Westerschelde, löp via de in 2003 ge-opende Westerscheldetunnel en Terneuzen door nao de Belzje grens bij Zelzate.
Dit artikel is e sjtumpke. De kans Wikipedia helpe door 't aan te völle