Waord

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

't Waord is 't kleinste zelfstenjig gebroekdje spraokelement det op 't niveau vanne spraektaal is opgeboewdj oet klenk en op 't niveau vanne sjrifspraok oet littere. Saer Ferdinand de Saussure wètj me det 't "waord" gesjeien is van 't kóncep. 't Is zoea dus neet krek te stèlle det e waord de kleinste einheid van meining zów zeen: de relaasje tösse ideeje en wäörd is namelik willekäörig.

'n Anger diffenisie van "waord" is de kleinste psychologisch-spraokkóndige einheid inne spraok die op zichzelf kan staon, in taengestèlling tot 't gebónje morfeem. E waord besteitj oet minimaal ei vrie morfeem en nól of mieë gebónje morfeme. Inne praktiek is 't 'n opeinvolging van aanein gesjreve littere, woraan ein door conventie euvereingekómme meining verbónjen is. Dit mèntj neet det e waord per diffenisie 'n "meiningsdragendje" (semantische) einheid is, went de deiler woroet 't is samegestèldj bezitten op zichzelf ouch 'n meining: de affixe be-, ver-, -e en zo wiejer höbben allemaol 'n eige meining.

De meining van lexeem kump vriewaal gans euverein mit die van waord. De term lexeem wuuertj aevel specifiek gebroek veur 't waord te óngersjeie vanne meiningsvól einheje op e lieëger niveau, ofwaal de gebónje morfeme.