Wil Willems
Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.
Wil Willems (Gelaen, 13 juni 1944 – Gelaen, 14 jannewarie 2011) waas 'ne Nederlandjse atleet.
Willems waas 'ne middellangeaafsjtandslouper dae mèt name gesjpecialiseerd waas in de steeplechase. Es lid van 't Mesjtreechse Kimbria waas hae in de jaore 1966 pes 1971 Nederlandjs recordhawwer op 't nummer 3000 m steeplechase en hae woort ouch vief keër Nederlandjs kampioen in dees disciplien. Zien lètste record, dat in 1971 woort verbaeterd door Egbert Nijstad, vestigde hae op 21 juli 1968 in 't Italiaanse Brescia. In deze wedsjtried leep hae ouch de limiet veur deilname aan de Olymische Sjpele van 1968 in Mexico City, mer ómdat hae neet biej de bèste twelf op de waereldranglies sjtóng, moosj hae vormbehawd toane biej 'ne race in Zagreb. Door extreem waersómsjtendigheje ónger dae wedsjtried zaog hae ziene Olympische druim aevel in rouk opgaon, dit óndanks dat hae biej eine wedsjtried in Brussel de waereldtopper Miel Puttemans ouch al èns haw versjlage.
In 1970 kaom, op 26-jaorige laeftied, ein eindj aan zien atletiekcarrière wiej biej häöm teelbalkanker woort geconsjtateerd. Dit beteikende mètein 't eindj van zien väöl te korte carrière es atleet. Willems, dae es kèndj aan dwangneuroses leej, woort in 1974 waeges psychische prebleme aafgekörd veur de arbeidsmert. Hae bleef aevel es teamleijer actief in de atletiekwaereld biej de altletiekvereiniging Unitas wo hae wirkde mèt talente es Frans Maas, Cor Lambregts, Rob de Brouwer, Peter Rusman en de Belzje sjprinter Patrick Stevens. Hae woort mèt de Zitterd-Gelaense vereiniging meërdere keëre Nederlandjs clubkampioen.