Watertaore in Sjömmert
Dit artikel is gesjreve (of begós) in 't Sjömmerts. Laes hie wie v'r mit de versjillende saorte Limburgs ómgaon.
De Watertaore in Sjömmert, auchwaal de Reus van Sjömmert geneump, is 'n 38 mèter hoage watertaore in Sjömmert in de gemeinte Beekdaele in de Nederlandsje provincie Limburg. De watertaore lik in de kern van Sjömmert, bie 't kruuspunt Taoresjtraot/Hagenswaeg/Achter Sjömmert/De Beckhofwaeg. De taore dateert oet 1927 en woort óntworpe door architec Jos Wielders, dae zich leet inspirere door de architectuur van de Amsterdamse Sjoal .
Baove in de taore bevond zich tot de Twiède Wereldoorlog e restaurant, dat bekind sjtóng ónger de naam "Oranje Restaurant". De taore is in de jaore '70 en '90 van de 20e ièw en recentelijk eind 2008 opgeknap. Sinds 29 mei 1997 haet de taore de sjtatus rieksmonument. WML (Waterleiding Maatschappij Limburg) haet de taore in 2015 verkoch aan de Sjömmertse óngernummer Nico Eurelings.
In 2021 öpende "De Reuch" wo-in, op versjillende verdepinge, 'ne winkel, 'n restaurant, 'n preuflokaal, 'n broewerie, 'n sjmaaktheater en 'n oetzichpunt zin gesitueerd.
Gegaeves bewirk
- Start van de boew in 1926, oplevering in 1927
- Boewkoste: 85.000 gulden
- Aannummer firma: Muyres & Zonen oet Sittard
- Hoagte: 38 meter
- Hoagste punt: 178 meter NAP
- 2 trappehoeze mit elk 156 treeje (tot de bovensjte verdeping)
- Betonne vlakbodemreservoir mit 'ne inhoud van 1150 kubieke meter
- Reservoir doorsneje: 13,5 meter, deepte: 7,9 meter
Trivia bewirk
De videoclip van 't nummer "Entertain You!" van Within Temptation is daels opgenomme in de watertoare.