Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


'n Doorsneej van 't Vostokmaer mitte ligking op Antarctica.

't Vostokmaer is e maer det in 1996 óntdèk is geworen en zich ónger 'n veer kilomaeter diekke ieskap in Antarctica bevindj.

't Vostokmaer is 't grótste maer van mieër es 140 maere die zich ónger 't ies bevinjen in Antarctica. 't Bevindj zich ónger 't Rössisch Vostokstation, de basis worop in 1983 de leegste temperatuur oppe aerd allertieje woort waargenómme: -89,2°C. 't Maer is 250 kilomaeter lank en 50 km breid. 't Besteit oet twieë bassins die verdeildj zeen door 'ne rögk; 't water baove deze rögk is 200 m deep; 't naordelik bassin is 400 m deep en 't zujelik 800 m.

Dore rögk kan de biologische en sjemische samestèlling vanne bassins versjillendj zeen. Mit 'n oppervlakdje van 15.690 km² haet 't 'n gemiddeldje deepdje van 344 m en 'ne gesjatdjen inhaad van 5400 km³. In mei 2005 woort 'n eilandj óntdèk inne midde van 't maer.

De gemiddeldje temperatuur van 't water ligk op zón −3 °C; 't water blief vleujbaar ónger 't normaal vreerpuntj dore hoeag drök van 't euverligkendj ies. De geothermische wurmdje vanne aerd verwurmp de baom van 't maer en 't ies baovenop 't maer isoleert 't water vanne lieëg temperaturen ane oppervlakdje vanne ieskap.

Óngerzeuk nao 't Vostokmaer is van belang veur 't vinje van boetenaerds laeve. 't Water oppe maon Europa (van Jupiter) bevindj zich ouch ónger 'n diekke laog ies; es me organisme vindj in 't Vostokmaer maak det de kans op laeven op dae maon väöl grótter.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Vostokmaer&oldid=445086"