Visby

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Visby is de grótste stad op 't Zweedse Oeaszieë-eilandj Gotlandj enne houfstad van zowaal de pervinsje Gotlands län es de gemèndje Gotlandj., die bei 't ganse eilandj (en inkel rónjelómligkendje eilenj) beslaon. De hanzestad tèltj 22.236 inwoeaners (2005), haet 'n oppervlakdje van 1208 hektaar of 12,08 km² en is ei vanne veertieën Zweedse werreldirfgeujer oppe Werreldirfgoodlies van UNESCO.

Visby woort róndj 't jaor 900 'n stad. In 1314 brandje de stad gans aaf, wonao die weer woort opgeboedj. Visby waar de moderstad van Riga (det noe de houfstad van Letlandj is) en haw ei vanne grótste hanzekentoearen en zitj allewiel bie de Nuuj Hanze.

Stadsbild

Visby steitj houfzakelik bekèndj veure gooddeils intakte, oeten dertieëndjen ieëf stammendje 3,4 km lang stadsmoer (ringmoer) rónjelóm 't aad deil vanne stad. Ouch guuef 't väöl middelieëfse geboewe (mieër es 200). De stadsindeiling stamp nag oete middelieëve. Doe ware zevetieën middelieëfse kirken in Visby, wovan de meiste toet rwiens zeen vervalle; ein is nag intak.

Visby is de bès-bewaardje en kómplieëtste hanzestad. De stadsmoer mitte veer paore (Norderport, Österport, Söderport en Skansport) enne dertieëndjenieëfse taores zeen nag bao gans intak. De rwiens vanne middelieëfse kirke getuge van e riek vergange, esouch 't middelieëfs straoteplan enne euverbliefsele van mieër es 200 opslaaghoezer en hanjeleershoezer oet dees periood.