Villadörp

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

E villadörp is e type dörp wat in rillatief recinten tied is oontstande es woenplaots veur rieke lui die boete de stad wouwe woene. In principe geit 't um plaotse die veur de koms vaan de villa's nog neet bestoonte of mer e gehuch/buurtsjap waore; bij oetbreiding weurt 't woord evels ouch wel gebruuk veur aw dörper die hun agrarische functie (bekans) compleet höbbe verlore en boete 'ne kleine dörpskern väöl villabebouwing kinne.

Villadörper vint me in Nederland väöl op en roond d'n Utrechsen Heuvelrögk. Dit heet de twieleiege oerzaak tot dit oonvröchbaar landsjap vreuger dunbevolk waor en väöl natuursjoen beit. Plaotse wie Hollandsche Rading, Bilthoven en Den Dolder zien neet awwer es ind negentienden iew. Dit kin me aon de bouw zien, boe-in gebouwe mèt 'n woenfunctie euverheerse. 't Gief in zoe'n dörper gein dörpspleine en ouch wieneg spoere vaan economische activiteit (boerderije, febrikke etc.), umtot de inwoeners vaan hun geld leefde of boete 't dörp wèrkde.

Awwer dörper die gooddeils 't karakter vaan villadörp höbbe gekrege zien oonder mie Rozendaal (op de Veluwe), Wassenaar en Bloemendaal (allebei in de Hollandse duine).