Tuinhagedisse
{{Watveurdialek}dit is ein sosjiolek: Leeves; 'n aafgeleide van 't Remunjs}
 |
Tot daen tied kan d'n inhaud van 't artikel veurnaam informatie misse of nog neet good in zie verbandj ligke. |
De Tuinhagedisse is 'n vastelaovendjvereiniging oet Leeve, e dörpke inne gemeinte Remunj.
Historie
bewirk(Ongersjtaonde teks kump oet ós 4 x 11 jäörig jubileumbook det is oetgebrach in 't jaor 2001 en opgezat door Rien Linssen.)
In 1957 begós in Leeve de belangsjtelling te greuje veur vastelaovend op eige gróntj. In kefee Vogels - van Herten (De Sjmeed) in de Broekhin waerde aan de sjtamtaofel van de vrunj Sjaak aan de Boom, Frans Lucas, Jan Mestrom, Geel Smets, Har en Sjuul Vogels oeteindelik de knoup doorgehak. Nao inkele naame bedach te höbbe, zoés Vérkesdes, waerde gekaoze veur Tuinhagedis, ein veulgebroekte term veur de nog jong vereiniging.
Mit Har Vogels es Prins en Sjaak aan de Boom es Vórs ginge ze es Tuinhagedis Broekhin van sjtart. De eerste Raod van ellef besjtóng oet Jan Vogels, Jan Graus, Har Graus, Jeu Mertens, Wim Naus, Jules Vogels, Jo Mertens, Geel Smets (bienaam: kattegeel), Frans Lucas en Jan Mestrom es Nar. V.V. De Tuinhagedisse waar de nuujeling in 't Remunjse vastelaovesgebeure. In 't alom bekende kefee van Tante Jet en Ome Bair waerd 't Prinsepelies gevestig.
De vereiniging ontwikkelde zich good en genoot grote bekendheid. De biezónger gooje teamgeis van de vereiniging en de hechte gemeinsjap van Leeve - Broekhin woore dao debet aan. Alle aovende van de Tuinhagedisse brachte veul miense oppe bein, ouch door de eige Prinsekepel, o.l.v. Jan Puts. De leeje van de Prinsekepel waare (en zeen) lid van de fanfaar St. Laurentius, ein meziekgezelsjap det altied achter de vastelaovesvereniging sjting.
V.V. De Tuinhagedisse, óngertösse aangeveurd door Vórs Frans van Eldijk (vanaaf 1962), woor de enige vastelaovesverenging die traditioneel op de ellefde van de ellefde 't sezoen äöpende mit häöre bontje aovend. Dees bontje aovende en door mit te werke aan de bontje aovende van ónger angere D'n Uul, brachte de vereniging grote naamsbekendheid. Ouch door 't mitwerke van "Meister Heyen" kwaam de kienjeroptoch toet sjtandj. D'er waerde ein vastelaovesgezetje oetgegaeve en biej 't ellef jäörig besjtaon waerde veur de eerste keer mitgedaon aan de optoch van Groot-Remunj. Dit és sjtap om toet grote samewerking te kómme mit alle Remunjse vastelaovesvereniginge.
Zeker door al dees ontwikkelinge waerde de jubileumreseptie 1 x 11 mit és motto "In Leeve en biej de Tuinhagedisse ken alles" ein groot succes.
- Mooder van de Tuinhagedisse
De eerste resepties, die nog get 'greun' van opzet waare, greujde in de loup der jaore oet toet waare happenings en waerde dan ouch in versjillende lokaties gehaaje. 't Prinsepelies is toet 1978 in kefee De Sjmeed in de Broekhin gewaes. Tante Jet zouw neet allein ein geweldige kasteleinse zien, mer ze zouw ouch begrip höbbe veur de soms heel klein dinge, die zo enorm belangriek zouwe zien in 't vereinigingslaeve. Hiejdoor kreeg ze den ouch de biejnaam "Mooder van de Tuinhagedisse"
Door 't aanlikge van ein viaduk in de Broekhin waerde kefee De Sjmeed aafgebraoke. Hiejdoor waerde dees episode aafgesjlaote. In daen tied haaj Leeve, ónger leiding van Ton Reynders, ein Prinsekepel die bereumd woor óm zien sjtiel en meziek.
V.V. De Tuinhagedisse kende veul hoogtepuntje, zoés 't bezeuk van Willen Duys aan de vereiniging, dae zich mit de Hoesorde van Grootvórs Bair Cox leet riddere. De sjpraekbekwaamheid van Grootvórs Bair en Vórs Frans van Eldijk verraste Willem Duys zo zeer det d'er bang waar det es Hilversum dit te heure kreeg hae zónger werk zou kómme te zitte.
Nao 't sjloete van kefee De Sjmeed waerde V.V. De Tuinhagedisse opgenaome biej Jaques en Nelly Wolters van kefee - restaurant Meneerkes. In deze tied greujde 't traditionele frühshoppe oet toet ein Meneerkesgebeure wao miense vanoet de ganse provinsie op aafkwaame.
Ouch de Bóntje Aovende waerde ein nuuj laeve ingeblaoze. Door de insjpanning van miense oet de vereiniginge en de veule artieste van eige gróntj waerde dees aovende, o.l.v. Frans van Eldijk, altied ein groot succes en waare altied toet de letste sjtool en get meer oetverkoch. V.V. De Tuinhagedisse haet zich mit veul geesdrif ingezat veur de ganse gemeinsjap, jónk en aad. Dao-oet is ouch de jeugvastelaovend gebaore en is de Jeugraod óntsjtange mit de origineel oetrooping van de Jeugprins. Nao ellef jaor "gewoond' te höbbe in Meneerkes, verhoesde de vereiniging nao kefee - zaal Moonen, woo ze terech kwoome biej Wiel en Mariet, die vastelaovesgek waare.
- Jubileumfees
Hoogtepuntj waar 't jubileumfees van 3 x 11 jaor Tuinhagedisse. Door de perseunlike insjpanning van Sjra Pollaert waar 't meugelik óm biejnao alle aad prinse biej-ein te kriege en zo veur 't naogesjlach vas te likge. Op de jubileumreseptie waerde veer jubilarisse, te weite Anny van Alphen - Koolen, Jules Vogels, Jan Puts en Tjeu Niessen, gehuldig. Ziej haaje zich 33 jaor langk volledig ingezat veur 't welzeen van de vereiniging. Ouch waerde aafsjied genaome van Vórs Frans van Eldijk, dae zich 30 jaor langk volledig haaj ingezat veur ut reile en zeile van V.V. De Tuinhagedisse en zo ein duudelike sjtempel haet gedrök op "zien" vereniging.
- Óngerkómme
Nao ein Vórsteloze periode van twee jaor waerde Frans Gommans in 1992 toet Vórs geïnsjtalleerd, waat d'er toet 1995 deej. Veul sjteun óngervónj de vereiniging van 't L.A.P.96, de opnuuj opgerichte vereniging van aad Prinse ónger veurzitterssjap van Roel Janssen, dae de vereiniging mit raod en daod biesjteit.
Nao de fatalen brandj in 1998 van zaal Lenssen verhoesde de vereniging terök nao "Meneerkes", woo ze door de femilie Wolters "leefdevol" waerde ontvange. 't Prinsepelies waar weer terök op zien aaj plaats. Mit 't verlaore gaon van de enige zaal in Leeve kwaam de vereniging veur ein dilemma te sjtaon. De traditioneel en alom bekende Bóntje Aovende kóste gein doorgangk meer höbbe.
Dankzie de wil van de femilie Vos - Stiphout kós men veur heur jaorlikse evenementen terech in de bedriefshal toet en mit 't vastelaovesezoen van 2001. Me kós neet meer in de hal terech door de bezwaore van ómwonende. 't 4 x 11 jäörig jubileum mós noodgedwonge gevierd waere in ein tent en 't sezoen 2001/2002 zellufs in ein (biejnao aafgekeurde) bedriefshal aan de Maas. Toch bleef de Prinsesjpreuk oet 1999: "Gein gezümp, de zaal dae kump" hoog gehaaje.
't Vastelaovessezoen 2002/2003 kós den eindelik weer in eine zaal gehaaje waere. De femilie Stienen durfde 't aan óm toch weer eine zaal te bouwe oppe plaats van de aafgebrande zaal.