Tigris

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

De luipe vannen Tigris ennen Eufraat.

d'n Tigris is 'ne reveer in 't Midden-Oeaste en ein vanne twieë groeate reveer van 't aad twieëstroumelandj Mesopotamië. Inne Törkse pervinsje Diyarbakır is ei distrik verneump nao de reveer: Dicle, d'n Törkse naam veure Tigris. d'n Tigris vörmp same mitte reveerdaal vanne Niel enne Eufraat de Vröchbaar Króm. De reveer grens anen uterste naordoeasteliken tump van Syrië.

De reveer d'n Tigris is 1900 kilomaeter lank en struimp vanaaf de berg in 't oeaste van Törkieje, dore Irakese stej Mosoel, Tikrit, Samarra en Bagdad nao 't zuudoeaste. Bie Basra, op 150 kilomaeter aaf vanne munjing, struimp d'n Tigris same mitten Eufraat. Van dao aaf struimp de verèndje reveer es Sjatt al-Arab door e groeat zómpgebied door Abadan nao de Perzische Golf.

Op 't landj tösse d'n Eufraat ennen Tigris, Mesopotamië of 't Twieëstroumelandj, höbben 'n hieël deil aaj besjavingen häören oearsprónk vónje, wie Soemerië, 't Akkadisch Riek, Babylonië en Assyrië.