Thanksgiving

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.

Thanksgiving ("dankzegkingsdaag") is 'ne nasjenale feesdaag in de Vereinigde Sjtaote en Canada. Traditionelerwies is dit d'n daag worop dank weurt oetgesjpraoke veur d'n ougs en veur allerhenj anger gooj dinger. In de Vereinigde Sjtaote weurt dezen daag gevierd op de veerde dónderdig in november; in Canada, wo d'n ougs eerder in 't jaor vilt, weurt 't op d'n twèdde maondig in oktober gevierd.

Thanksgiving weurt gevierd mit de ganse femielie; döks ligk me grote aafsjtenj aaf veur biejein te kinne zeen. Ómdet 't in de Vereinigde Sjtaote altied op 'nen dónderdig vilt is 't meistes ouch zo det werknummers ouch vriedigs vrie kriege, wodoor 'n femieliereünie veer daag doert. 't Aete sjpeelt 'n centraal rol: traditionelerwies èt me kalkoen, wodoor luuj ouch waal spraeke van Turkey Day ("kalkoendaag").

De Amerikaanse traditie associeert de feesdaag mit e fees det door de Pelgrimvaders waerde gevierd in 1621 toe zie in Plymouth 'n nederzètting hajje gesjtich.

E groot deil van de oorsjprunkelike, inheimse Indiane in Amerika zeen de feesdaag neet es 'nen daag óm dankbaar te zeen, mer eerder es 'ne rouwdaag. Vanaaf daen tied begós 't procès worin zie häör landj verlore en de bevolking aafnoom.