Bujelwouf

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

De (Tasmaanse) bujelwouf of Tasmaansen tieger (Letien: Thylacinus cynocephalus) is 'n oetgestórve deersaort waat veurkwaamp op Australië en Tasmanië, waat vèltj óngere bujelbieëster. 't Bieës stórf ieës oet op Australië dore kóms vannen dingo, en oetèntjelik róndj 1936 ouch op Tasmanië dore jach.

De kop vanne bujelwouf haet väöl eweg van dae van hóndjechtige, waat ouch zörg veure beneuming "wouf". 't Bieës is aevel neet biezunjer nej verwantj aan wölf. De euvereinkumsten in 't uterlik zeen 't gevolg van convergente evolutie in e saortgeliek niche; de bujelwouf noom op Australië en Tasmanië de plaats in waat in Naord-Amerika, Europa en Azië gevöldj wuuert dore grieze wouf.

De alternatief beneuming "tieger" is 'n verwiezing nao de struipen euvere rögk, die deendje es kammeflaasj inne bus. De bujelwouf haw 'ne lange stert, wo dees struipen ouch alikszins euver doorlepe. In taengestèlling toette anger bujelbieëster op Australië wore de veur- en achterpuuet aeve lank.

Taxonomie

Riek: Animalia (dere)
- Stam: Chordata (chordabieëster)
  - Klas: Mammalia (zougdere)
    - Infraklas: Marsupialia (bujelbieëster)
      - Baovenorde: Australidelphia
        Orde: Dasyuromorphia (roufbujelbieëster)
        Femielje: Thylacinidae