Nijkerk

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Nijkerk in Gelderland

Nijkerk (Wes-Veluws Niekark) is 'n klein stad en gemeinte in de Nederlandse provincie Gelderland, op de Veluwe, mèt 'n oppervlak vaan 72,05 km² (daovaan 2,54 km² water) en (per 1 januari 2007) 38.879 inwoeners. Neve de hoofplaots Nijkerk ligke binne de gemeinte nog de dörper en gehuchter Achterhoek, Appel, De Veenhuis, Doornsteeg, Driedorp, Hoevelaken, Holk, Holkerveen, Kruishaar, Nekkeveld, Nijkerkerveen, Prinsenkamp, Slichtenhorst, 't Woud en Wullenhove. De stad Nijkerk zelf heet oongeveer 20.000 inwoeners.

Functies

Nijkerk is 'n forenzestad veur Amersfoort en is allewijl es greujkern aongeweze. Mèt d'n aonlag vaan nui wieke moot 't aontal inwoeners nao 51.000 greuje en min of mie aon Amersfoort vasgreuje. Daodoor is Nijkerk feitelik de einege Gelderse gemeinte in de Randstad (es me die rojm definieert).

Stadsgeziech

Nijkerk heet neet zoe toeristisch aongeziech es ander stedsjes op de Veluwezoom, wie Harderwijk en Elburg. Toch vint me ouch hei e paar hierehoezer. Ouch bezeensweerdeg is de Groete Kèrk.

Historie

Nijkerk is verneump nao de nui kèrk die in de daartiende iew es vervaanging vaan de afgebrande aw kepel woort gebouwd; dit is de veurluipr vaan de huiege Groete Kèrk. De plaots waor twisappel tösse de bisjop vaan Utrei en de graof vaan Gelder, wie de lèste 't dörp in 1412 platbrandde gaof heer Nijkerk 't jaor dao-op es vergeujing stadsrechte en tolvrijheid. Nijkerk waor iewelaank e rösteg pläötske meh in de achtiende iew kaom 't tot groete riekdóm door o.m. d'n handel in tabak. In de jaore 1749 en 1750 waor de plaots 't centrum vaan de Nijkerkse bereuring, e soort puriteins reveil oonder dominee Gerardus Kuypers. In de negentiende iew stortde de Nederlandse tabaksteelt gans in en verveel de Veluwe en ouch Nijkerk tot hendege ermeuj. De kóms vaan 't spoer brach dao e bitteke verandering in.

Gebore in Nijkerk

• Bernardus Johannes Alfrink, aartsbisjop vaan Utrei
• Harm Bruins Slot, politicus

Externe link

• Website vaan de gemeinte