Kreeg in Hoeëg-Karabach (2020)

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

---

Dit artikel geit euver 'n doorgaonde gebäörtenis D'n inhawd van dit artikel kan naovenant gauw verangere en kan mesjiens neet gans mie kloppe mit de lèste óntwikkelinge.

D'r Kreeg in Hoeëg-Karabach is 'n actueel conflik tussje Azerbeidzjan enerzieds en de Rippebliek Artsach en Armenië angerzieds rónkum de regio Artsach. 't Is de mieës recente escalatie van 'n aod conflik um dees regio, die de jure óp 't grónkgebeed van Azerbeidzjan ligk, mar de facto al seër d'r wapesjtilsjtand van 1994 weëd besjtuurd durch Armene. Artsach weëd bekans oetsjletend durch Armene bewoeënd. 't Is de groeëtste escalatie seër d'r kreeg van 1988-1994, wie Artsach de ónaafhankelikheed oetreep. Doavuur goof 't 'n Azerbeidzjaanse minderheed in Artsach en 'n groeëte Armeense minderheed in Azerbeidjzaanse sjteë, mar pogroms en etnische zuveringe hant bei leng gooddeels mono-etnisch gemaak.

't Conflik begós in d'r vreuge mörge van 27 september 2020, wie Azerbeidzjan en Artsach zich óngeree besjuldigde van 't sjende van d'r wapesjtilsjtand. Deëzelfde daag woeëd d'r noeëdtouwsjtand en totaal mobilisatie aafgekondig. Azerbeidzjan begós e militair offensief in 't zude van Artsach, dat gemekkeliger te verovere is es 't bergechtige noarde. Tussje d'r 27e september en d'r 23e oktober koame versjillende kling sjtedjes en dörpkes in heng van de Azerbeidzjaanse armee, woeë-ónger Cəbrayıl, Hadroet en Kovsakan (Zəngilan) en Varanda (Füzuli).

De Azerbeidzjaanse sjtad Gəncə en Stepanakert, de hoofsjtad van Artsach, woeëde mieëder kiere besjtook mit ballistische rakette. Vuur 't ieësj woeëde óch óp groeëte sjaal Turkse en Israelische drones igezat durch Azerbeidzjan.

Óp d'r 10e en d'r 17e oktober woeëd ópnuits 'ne wapesjtilsjtand gesjlote, mar deë bleek wieënig effek te han.