[[Plaetje:Ice_Hockey_sharks_ducks.jpg|thumb|'nen Ieshockeymatch: de San Jose Sharks tege de Anaheim Ducks.]]
'''Ieshockey''' is 'ne [[wintersport]] gespäöld op 'n iesbaon, mèt twie teams vaan zès speulers (einen doelmaan en vief veldspeulers) op [[sjaats]]e. Doel is um 'ne [[rubber]]e sjief, de ''puck'', in 't doel vaan d'n aander te kriege. Heiveur heet me 'n oor d'n tied, ingedeild in drei periodes vaan 20 menute. Liefelek contak is touwgestande um de balpuck aof te pakke; in 't bezunder de ''body check''. De sport is oontstande oet [[hockey|veldhockey]] en kraog ind negentienden iew vaste vörm in [[Canada]]. Dao is 't in feite de nationaole sport; dit land heet ouch 't mieste sportief succes. Wijers is de sport ouch populair in de [[Vereinegde Staote]], in Midde- en [[Oos-Europa]] en in [[Scandinavië]]. In die len versteit me oonder ''hockey'' zoonder mie gemeinelek ieshockey in plaots vaan veldhockey. Topclubs oet Canada en de VS speule in de [[National Hockey League]] (NHL), die oet Oos-Europa in de [[Continentaole Hockeyliga]] (KHL). De sport weurt gereguleerd door de [[IIHF]]. Ieshockey is sinds 1920 [[Olympische Speule|Olympisch]]; al laanger es tot 't apaarte Winterspeule gief. De Olympische Speule zien 't veurnaomste platform boe-op interlandieshockey weurt gespeuld. De sport weurt gepreze um zie hoeg speultempo en naovenante aontrèkkelekheid veur de kieker, meh krijg väöl kritiek um 't rouw speul en 't groet aontal blessures wat dat oplievert. Me moot ieshockey neet verwarre mèt 't geliekaardeg oetziend [[bandy]].
