'''Giuseppe Fortunino Francesco Verdi''' ([[Busseto]], 9 of 10 oktober 1813 - [[Milaan]], 27 jannewarie 1901) waor 'nen Italiaanse componis. Heer is veural bekind gewore door zien [[opera]]'s. Heer kreegkraog in zien woenplaots compositieles en begós roond 1840 mèt de compositie vaan opera in de geis vaan Donizetti en Bellini. Ziene vreugen opera ''Nabucco'' (1842) had al zoe groet succes tot ziene naom gemaak waor; nao nog e paar jaor hel wèrke waor heer bekind in gans Italië. Verdi tuinde sympathie veur de idee vaan e vereineg Italië; um die rei waore zien opera's soms oonderwerp vaan [[censuur]]. Verdi bleef tot op hoege leeftied succesvol opera's componere, wie ''Macbeth'' (1847), ''Rigoletto'' (1851), ''Il trovatore'' (1853), ''La traviata'' (1853), ''La forza del destino'' (1862), ''Aida'' (1872), ''Otello'' (1887) en ''Falstaff'' (1893). Wijer sjreef heer oonder mie e [[requiem]] (1874) en get instrumentaole meziek (boe-oonder e [[striekkwartèt]], 1873). Verdi had 'n groete veurleefde veur literair [[libretto|libretti]], dèks nao speule vaan [[William Shakespeare|Shakespeare]]. In zien opera's zuut me 'n oontwikkeling vaan 't vreugromantisch [[belcanto]] mèt väöl bravoure-aria's nao meziek boe-in de dramatiek veur 't vocaol vertuin geit. Ouch huurt me in zien later werk 'n neiging tot muzikaol experimentere, oonder invlood vaan (meh laank neet zoe ingriepend wie) Wagner. Zien opera's zien nao zienen doed noets vaan 't rippertoire gebleve en dominere, same mèt de werke vaan [[Giacomo Puccini]], nog ummer d'n operawereld. Väöl vaan zien aria's hure tot 't allerbekindste wat de klassieke meziek te beiebeeje heet.
