Duits hierevoetbalèlftal: Versjèl tösje versies

 

==Historie==

Al in 1898 woort veur 't ierst 'nen officieuze wèdstrijd gespäöld door e Duits landeteam. De DFB woort in [[1900]] opgeriech en begós ziech astrein bezeg te hawwe mèt 't opzètte vaan 'n officieel èlftal. In 1908 waor me zoewied: Duitsland späölde tege [[Zwitsers hierevoetbalèlftal|Zwitserland]] en verloor mèt 5-3. De Zwitsers höbbe sindsdeen ummer de status vaan "ierste tegestander" vaan Duitsland gehawwe: ouch wie nao de bei Wereldoorloge 't team obbenuits mós weure opgebouwd, en nao de Duitse hereineging, waor 't ummer Zwitserland wat es ierste tege de Pruse späölde. De volgende jaore bouwde me wijer en in 1912 kós me 'n èlftal nao de [[Olympische Speule]] sjikke. Dit èlftal won mèt enorm euvermach vaan [[Russisch hierevoetbalèlftal|Rusland]] (16-0, mèt tien gole vaan [[Gottfried Fuchs]]) meh kós neet op tege [[Oosterieks hierevoetbalèlftal|Oosteriek]] en [[Hongaars hierevoetbalèlftal|Hongarije]]. Duitsland späölde in de [[Twiede Riek|keizertied]] in de kleure vaan de Pruse vlag: zwart en wit. Die outfitkleure heet 't tot op d'n huiegen daag gehawwe.

 

Oonder de [[Weimarer Rippubliek]] waor 't Duits voetbal trök bij aof; boete tot veer jaor neet op niveau gevoetbald waor, wouwe diverse len neet tege Duitsland speule. Pas ind jaore twinteg kaom dao verandering in. Aon 't ierste WK vaan 1930 deeg Duitsland neet mèt (um financieel reies: Zuid-Amerika waor hun te wied), in 1934 waore ze wel debij en woorte ze oetindelek daarde. Intösse waor Hitler aon de mach gekoume en in de ierste jaore vaan 't [[Daarde Riek]] waor voetbal e geleef propagandamiddel. Ouch op de Speule vaan 1936 in Berlijn oontbraok Die Mannschaft neet. In 1938 woort de [[Anschluss|vereineging mèt Oosteriek]] e feit; umtot dit toen e zier sterk voetballand waor, beteikende dit 'n groete versterking veur 't Duits voetbal. De rizzeltaote op 't WK waore dat jaor evels teleurstèllend. Vaanaof 1941, wie Duitsland in de riechting vaan d'n totaolen oorlog góng, waor topvoetbal neet mie gewuns: jóng manslui waore aon 't froont nujeg.

 

Nao d'n Twiede Wereldoorlog woort Duitsland obbenuits oetgeslote vaan internationaol wèdstrije. De [[FIFA]] verbooj 't zien leie zelfs um tege Duitsland (en [[Japans hierevoetbalèlftal|Japan]]) te voetballe. In [[1949]] woort dat verbod opgeluf. Op 't WK vaan 1950 oontbraoke ze nog; de DFB waor pas begin dat jaor weer nui opgeriech. Oongeveer tegeliek riechde me in de [[DDR]] [[Oos-Duits hierevoetbalèlftal|'n eige team]] op, wat twie jaor ieder al in [[Saarlands voetbalèlftal|Saarland]] waor gedoon. Bij 't WK vaan 1954 in Zwitserland moch Duitsland aontrejje. Tot de verrassing vaan edereine woorte ze wereldkampioen door in de finale mèt 3-2 vaan Hongarije te winne. 't Hongaars team waor toen op zie huugdepunt, Wes-Duitsland had in de grópsfaas al kansloes vaan ze verlore en de Hongare kaome binne de tien menute mèt 2-0 veur; de compleet oonverwachte wending weurt 't [[Woonder vaan Bern]] geneump. Door de versjrikkinge vaan d'n oorlog en de zwuregheid vaan de naovolgende jaore waor de beteikenis vaan dezen titel vaan väöl mie es sportief belaank.

 

De noe hoeggespanne verwachtinge kós Wes-Duitsland op 't WK vaan 1958 neet woermake. Ouch 't WK vaan 1962 woort gei groet succes. In 1966 stoonte ze in de finaal tegeneuver gasland [[Ingels hierevoetbalèlftal|Ingeland]], boe ze nao verlenginge vaan verlore. Vernuid succes kaom nao 1970: iers de wins vaan 't EK in 't Belsj (1972), daan in 1974 de wins op 't WK in eige land, boe ze in de finaal vaan [[Nederlands voetbalèlftal|Nederland]] wonne. Op dit toernooj späölde Wes-Duitsland ouch 'ne poulewèdstrijd tege Oos-Duitsland, dee woort verlore en veural vaan oosteleke kant sterk door propaganda umgeve waor. Op 't WK vaan 1978 in Argentinië presteerde ze teleurstèllend; toes woort zelfs vaan de 'sjan vaan [[Córdoba (Argentinië)|Córdoba]]' gesproke. De jaore dao-op waore ouch wisselvallig: ze woorte twie kier twiede op de WK's vaan 1982 en 1986 en Europees kampioen in 1984, meh 't team had ouch groete verleze te verdore. Op 't wijer succesvol WK vaan 1982 waor 't land mèt Oosteriek betrokke bij 't [[Non-agressiepak vaan Gigon]]: 'n 1-0 salonwins veur Wes-Duitsland die bei teams 't wijer avvecere garandeerde.

 

 

[[Categorie:Duutsjland|hierevoetbalelftal]]