[[Plaetje:Drees, W. - SFA002019221.jpg|thumb|Willem Drees.]]
Nao de bevrijing kaom de SDAP, nao 'n fusie en 'n programmaveraanderingprogrammaverandering gaw umgeduip in [[PvdA]], es groetste partij nao veure. [[Willem Drees]] woort premier vaan vief kabinètte (boevaan twie mèt 'nen aandere); door de toen nui samewèrking mèt de [[KVP]] (opvolger vaan de RKSP) sprik me vaan ''roems-roej kabinètte''. 't Sociaol-democratisch beleid vaan Drees beteikende 't begin vaan de [[verzörgingsstaot]]. In [[1948]] traoj de Willemien nao 50 jaor regering oet eige beweging aof; häör dochter [[Juliana vaan de Nederlen|Juliana]] naom häör plaots in. Intösse waor Nederlands-Indië al zoeget direk nao de capitulatie vaan de Japanners in opstand gekoume. Nederland accepteerde gein oonaofhenkelekheid en voch d'n opstand aon mèt oorloge die ''[[politioneel acties]]'' woorte geduip. Oetindelek mós Nederland in [[1949]] toch [[Indonesië]] es souverein staot erkinne. 't Koloniaol tiedperk waor gans veurbij wie in [[1954]] 't [[Statuut veur 't Keuninkriek vaan de Nederlen]] woort opgestèld. Economisch waor dit 'nen tied vaan veurziechteg herstèl, geveujd door de Amerikaanse [[Marshallhölp]]. Nederland, mèt naome [[Zieland]] en [[Zuid-Holland]], kraoge nao wel 'ne zwoere slaag te verdore in fibberwarie [[1953]], wie de lèste groete [[Watersnoedramp (1953)|watersnoed]] aon mier es 1800 lui 't leve kosde. Dit leide tot de bouw vaan de [[Deltawerke]] (zuug ouch [[#Hydrografie|bove]]).
In de late jaore zesteg begós Nederland, veural de Randstad, sterk te verlinkse. In Amsterdam kaome beweginge op wie [[Provo]] en de [[Kabouters]], radicaol linkse partije kraoge greujenden aonhaank en de PvdA woort mie oetgesproke. 't Bewind vaan 't [[kabinèt-Den Uyl]] ([[1973]]-[[1977]]) kin es veurbeeld dene. Ideologische reies brachte in [[1975]] Nederland detouw [[Suriname]] zien oonaofhenkelekheid touw te stoon. Tegeliek voolt me ziech es vreugere kolonisator (en slaovedrijver) verpliech royaol immigratieregelinge veur Surinamers in te stèlle. Ouch kaome vaanaof de jaore zesteg gasarbeiers oet 't mediterraon gebeed nao Nederland, vaan wee veural de Turke en Marokkaone zouwe blieve. Nederland veranderde in de jaore zeveteg in 'n [[multicultureel sameleving]].
