Beverwijk

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Beverwijk in Noord-Holland

Beverwijk is 'n stad en gemeinte in de Nederlandse provincie Noord-Holland, in 't Kennemerland, mèt (1 juli 2006) 36.605 inwoeners en 'n oppervlekde vaan 19,60 km² (boevaan 1,78 km² water). Binne de gemeinte ligk wijer nog de kern Wijk aan Zee. Besjèrmheilege vaan Beverwijk is Agatha; veur wee de stad ouch e beivaartoord is. Väöl inwoeners vinde werk bij de hoegoves vaan Corus bij Velsen, te zuie vaan Beverwijk. Beverwijk steit bekind um de Beverwijkse Bazaar, de groetste euverdekde merret vaan Europa.

Historie

De naom is 'n verbastering vaan Beevaertswijck en sleit op de status vaan Beverwijk es beivaartsoord. De vreuger naom waor Sint-Aagtenkerke, ouch die sleit op de cultus roond Sinte-Agatha. Volges de legende is dees heilege hei tijens de invalle vaan de Noormanne versjene aon e meidske wat op de vlöch waor. In 1298 kraog de plaots stadsrechte. De volgende iewe leit Beverwijk e relatief slaopend bestoon, tot ze in de zeventiende iew populair weurt es vestegingsplaots veur rieke Amsterdammers. Vaanaof 1800 weurt, nao aonleiing vaan de Slaag bij Castricum, bij Beverwijk 'n verdeidegingslinie aongelag, oonderdeil vaan e gans netwerk vaan linies in Noord-Holland. In d'n Twiede Wereldoorlog weurt in Beverwijk 'n razzia gehawwe boebij 500 willekäörege maander opgepak weure. In 1997 vint hei de Slaag bij Beverwijk plaots tösse vootbalhooligans vaan Ajax en Feyenoord, boebij einen doeje vèlt.

Externe link

• Website vaan de gemeinte