Waope van Mofert

`t Waope van Mofert

Heraldische ómsjrieving

De heraldische ómsjrieving van `t waope van Mofert is: "`n sjildj van lazuur, belaje mit `n kestieël mit twieë van kruse verzene gekanteelde tores, alles van goud, stäöndje oppe top van `ne berg of heuvel van `tzelfde.

Verklaoring

`t Waope is aafgelèdj van `ne zegel van de sjepebank van Mofert. De kluuere lazuur en goud zeen de kluuere van `t Hertogdom Gelder. `t kestieël oppe berg symboliseert `t kestieël Mofert, waat auch op `ne berg geboewd is.

Gesjiedenis

De zegel vanne sjepebank

De sjepebank van Mofert haet `ne langen tied, in eder geval toet 1493, geine eige zegel gehad. In `n stök vanne sjepebank, det oet `t jaor 1493 gedateerd is, steit vermeldj steit det zie zelf geine zegel höbbe en det zie daoróm de sjout verzeuke ziene zegel aan `t stök te hange. Later, in eder gaval in 1614, haw de sjepebank waal `ne eige zegel. Aan `n stök van det jaor hink `ne zegel, dae d’r es volg oet zuut: `n Sjild mit `ne berg, mit dao-op `n kestieël mit aan edere kantj `ne gekanteelde tore, mit spits en baovenoppe spits `n kruuts. De tores zeen eder van twieë rame verzeen. Inne moer tösse de tores in zit in `t midde `n port. `t Sjild is ómgaeve door `t randjsjrif “S. Scab. De. Montfort.” Dit is `n aafkorting van “Sigillum Scabinorum de Montfort” en beteikend “Sjepebank van Mofert”.

Aanvraog gemèndjewaope door de Gemèndje Mofert

Op 5 mieërt 1883 besluut `t gemèndjebestuur van Mofert óm `n gemèndjewaope aan te vraoge bie Keuning Wullem III: ‘’Bij eene regeling en beschrijving van het oud-archief dezer gemeente, waarmede een bekwaam persoon zich in zijnen vrijen tijd onledig houdt, bevinden wij een afdruk van het wapen van het ambt Montfort, thans de gemeente Montfort. Het gemeentebestuur wenscht dit wapen tot gemeentezegel verheven te zien, waarom wij ons tot U.H.Ed.Getr. wenden met het beleefd verzoek ons te willen inlichten welken weg wij te volgen hebben om daartoe te geraken.’’ Waasjienlik weurd mit dae ‘’afdruk van het wapen van het ambt Montfort’’ `ne aafdrök vanne sjepezegel bedoeld. In det geval klop `t neet gans, waat `t gemèndjebestuur in häöre breef sjrief. `t Geit namelik ómme zegel vanne sjepebank van Mofert en neet óm `t waope van `t Amb Mofert.

Verlening van `t waope door Keuning Wullem III

Op 5 juli 1887 verleent Keuning Wullem III `n gemèndjewaope aan Mofert, mit de volgende heraldische ómsjrieving: ‘'een schild van lazuur, beladen met een kasteel met twee van kruisen voorziene gekantelde torens, alles van goud, staande op den top van een berg of heuvel van hetzelfde, het schild omgeven door het randschrift Gemeentebestuur van Montfort'’.

`t Sjient det de Gemèndjeraod ieërs haw gevraog veur `ne berg van sinopel (greun), mer det waere dore Hoeage Raod van Adel aafgeweze vanwaege????

Gemèndjewaope geit door es dörpswaope

Naodet in 1991 de Gemèndje Mofert op ging inne Gemèndje Postert (later de Gemèndje Amb Mofert) weurd `t waope alein nag gebroek es dörpswaope, mer dan zónger `t randjsjrif.

`t Waope es basis veur vereinigingswaopes

`t Waope van Mofert kump väöl veur in de logo’s en waopes van Moferter vereiniginge, ónger angere bie:

• Koninklijke Fanfare De Vriendenkring
• Schutterij St. Urbanus: In zwart-wit.
• Sportvereniging Montfort `60
• Voetbalvereniging Sport na Arbeid "V.V. S.N.A."
• Verenigingenraad Montfort: Mit es aafwieking det de berg van keel (roead) is in plaats van goud.