D'r Nederlandstalige term ''''Platdiets'''' um 't Plat va [[Voere]] te beneume is in de jaore 60 in Vlaandere oontsjtaande. De Voerenaere eeges neumde hun Plat doe nog allemaolgewoeën en zoonder biebedoelinge 't Plat (Moelings en Voeres) of 't Platduutsj (Oos-Voeres).
D'r naam Platdiets waoërt dör Vlamsje politici aa-gegraeëpe um in Vlaandere eeges mit taalkundige argumaente aannaemelek te make vörwat de mieërderheed van de bevolking va Voere vör 't Fraans kaoës. 't Platdiets zow 'n taal zieë die in zichzelf 'n taalkeus tusje de standaardtale 't Nederlands of 't Fraans aoëpe heel. Dis taalkeus waor dus väör alle aander luuj in Vlaandere ging optie want dao waoërte dialecte gekald die alling bie 't Nederlands hure. Me mot neet vergaeëte dat in dae tied 't oet Nederland geïmporteerde ABN de Vlamingen nog ummer vraemer aa-deeg es 't Fraans.
D'r Nederlandstalige naam Platdiets vör de taal va Voere is dus 'n politieke constructie in 't kader van d'r taalpolitiek dae va Vlaandere 'n homogeen Nederlandstalig gebied woolt make dör de mäögelekheed van 't zelfstandig make van 'n taalkeuze oet 't bewustzieë van de Vlaminge te haowe. Voere moeg dus gee väörbeeld waeëre in dae zin en dus waoërt van 't dialect dat me dao kalde get gaans speciaals gemakt. Dör Vlamsje politici.
In dae tied hubbe de Vlaminge in Voere en Moelinge d'r naam van hun dialect van Plat-duutsj verenderd in 't Vlamsj. Daomit goof me dan aa dat me voond dat hun Plat dao dezelfde 'natuurleke' wirking how es de dialecte in Vlaandere: n.l. 't Nederlands es standaardtaal. De Franstalige in Voere zeunten Moelinge bleve d'r naam Platduutsj blievePlat behaowe en in 't Oos-Voeres neumt me 't dialect nog ummer Platduutsj, zjuus wie de luuj in 't Moontsener gebied. Zjuus wie vreuger. D'r oetsjpraak, dat luuj die van oudsher d'r term platduuutsj vör hun dialect gebruke, daomit zowwe wille zigke dat ze 'n taal kalle die neet verboonde is mit 't Zuud-West-Nederfrankisch of 't Limburgs, klopt dus neet. Dis interpretatie van 't gebruuk van d'r term Platduutsj is 't gevolg van 't feit, dat d'r Nederlandstalige term Platdiets, vör 't Plat va Voere, huutsedaag in d'r ege Vlamsje kontekst uvverbodig is waoëre -Vlaandere is Nederlandstalig, 't is in 2000 dör de aktie va Mergelsberg och bewaeze dat zelfs de Vlaminge in Voere dat definitief zeunt! - mae es idee waal nog deepgeworteld in 't Vlamsj collectief bewuszieë aanwezig is. Mitstens wert zoe'n idee dan tiedelek in 'n ander kultuurgemeensjap 'hinein interpretiert' bis dat dao 'n reaktie op keump - es wie dit sjtukske beväörbeld - en de ege bevolking tut inzich keump, ziet wie de gesjiedenis gegange haat en dao vraej mit haat of kriet. Pas da kint dat idee vergoeë en is me vaeërdeg vör d'rne volgende sjtap in Vlaandere. Beväörbeld 't Erkenneerkenne van de dialecte mae och 't Fraans i Voere in de paasende Europese statute.
