Slevrouweplein (Mestreech)

't Slevrouweplein (Nederlands: Onze-Lieve-Vrouweplein) in 'ne plein in 't centrum vaan Mestreech. 't Plein is gekend um zien terrase, de Slevrouwekèrk en 't Derlon Hotel mèt zien Romeinse ruïnes in zien kelder.

Slevrouweplein mèt terrase en Slevrouwekèrk.

Historie

't Plein vörmt al sins de Romeinse tied 't centrum vaan de stad. Roontelum 't plein zien väöl späör vaan Romeinse gebouw gevonde. Allezeleve is de Slevrouwekèrk gebouwd op 'ne Romeinse tempel.

Slevrouweplein zjus veur de sloop vaan de Sint Nicolaaskèrk. Op de veurgrond is de Slevrouwekerk te zeen.

Veur 'n laange tied waor 't plein gein plein. D'r stoond naomelek 'n kèrk op 't plein; de Sint Nicolaaskèrk. Dees kèrk woort gestich door Gerard vaan Jobeke, 'n kanunnik. Roond 1340 sjink heer get hoeser aon 't plein um te slope en de kèrk d'r op te bouwe (aon de kaant vaan 't Derlon Hotel). De kèrk is voltooid in 1342 en in 1343 in gebruuk genome es parochiekèrk vaan de Slevrouwekèrk (zjus wie de Sint Janskèrk 'n parochiekèrk vaan de Sint Servaoskèrk waor). Es de Sint Nicolaaskèrk nao ongebruuk tiedens de Franse tied in verval raok weurt de kèrk in 1837 gesloop en ontstaot zoe 't huiige plein.

't Plein kint gein symbolisch traditie veur eveneminte zoe wie de Merret of de Vriethof en kin zoe mèt zie horeca en knojzege karakter gezeen weure es de keuke vaan Mestreech.