Tebannet

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Tebannet (Nederlands: Banholt) ies 'n dörp in de gemeinte Mergraote op 't plateau in Zuud Limburg. De naam kump van ban en holt. Holt in de beteikenis van bösj. 'ne Banbösj ies 'ne bösj woa allein de keuning rech haet um te jage.

Tebannet huèrde tot 1982 same mèt de buurtsjap Terhoorsj (Terhorst) tot de gemeinte Maer (Mheer). In 2003 wone d'r 1100 luuj.

Bezeenswaerdig

• De kèrk gewiejd aan de heilige Gerlachus. Zie ies in 1875 geboewd es rectoraatskèrk, nao 'n lank conflict mèt Maer veur ein eige parochiekèrk. In 1937 weurt Tebannet ein eige parochie.

De tore haet de, ón-Limburgse, vörm van ein zadeldaak. Achter 't koar bevingk ziech 'n Lourdesgrot. Al veur dat Tebannet ein eige parochie waor, besjteit 'r de baevaart nao Sint Gerlach. Dit in naovolging van de cultus in Houtem. Nao de 60erjaore in de 20e ièw ies dit in onbruuk geraak.

• Ein aantal vakwerkhoezer ies bewaard gebleve en zelfs (her)opgeboewd.

Dörpsvereiniginge

• Jónkheid van Tebannet
• Harmonie Amicitia

Folklore

• 't Burkbraëne op de 1e zóndig van de vaste. De kinger van 't dörp trèkke dan mèt fakkele ónder begeleiding van de harmonie nao 'ne brandsjtapel en sjteke dao 't vuur in.
• De kèrmes mèt de Pinkstere begint mèt 't plante van de Gerlachusden. Dees weurt door de jónkheid oet de Boveste Bösj gehaold bie Ièpe.
• Zomercarnaval op 'ne zóndig in juli mèt optoch.