Mienekes van Ophaove

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

Mienekes van Ophaove, voloet Dominicus Hubertus van Ophoven (Mofert, 24 januari 1838 – Bonn, 1926), waas ’ne Limburgse pioneer op ’t gebied van de landjboew. Hae is verantjwäördelik veur ’n aanzeenlik deil druuegligkinge en óntginninge in Limburg en Braobantj.

Laevesloup

Mienekes van Ophaove is in Mofert opgegrujd es veerde kindj van Peter van Ophaove (12 juli 1800 – 16 april 1874) en Anna Barbara Frencken.

In 1880 waas hae pechter van ’n boerderie bie Kölle. Hiebie is d’r in aanraking gekómme mit ’t gebroek van kunsmès.

Braobantj

In 1880 koom d’r in ’t bezit van e landjgood ónger ’t Braobantjse Mill. Veur de óntginning hievan richdje d’r de N.V. Maotsjappie toet Exploitatie van de Landjboewóngernumming Princepeel op, nao ’t gelieknamige landjhoes. Nao de meujzame decennialang óntginninge van zien veurgengers, slaagdje hae drin ’t gebied van 540 ha in tieën jaor tied óm te zitte in vröchbare landjboewgróndj. Róndj 1900 waas d’r eigenieër en directeur van dit landjgood det aevenèns De Princepeel hètj.

Limburg

Veural in Midde-Limburg is de nuuedige gróndj óntgindj. Aan ’t inj vanne negetieëndje ieëw begós d’r mit ’t druuegligke van Pötbrook bie D’n Deelgaard. Ouch introduceerdje hae in zien gebäörtedörp de kunsmès. Wiejer waas d’r ’ne lieërmeister van de paters van abdie Lilbosch bie Pej.

Aan ’t begin van de twintjigste ieëw óntwikkeldje hae zich toet de belangriekste óntginner vanne Pieël.

Weiteswaerdig

• De Dominicuswaeg in ’t boetegebied van Mofert is nao deze miens verneump. Deze waeg löp nao Pepinusbrögk bie Pej, det hae ouch óntgonne haet.